Råka av dataangrep: Slik har Kvinnheringen laga papiravis i 2022

Natt til tysdag 28. desember vart Amedia, konsernet som eig Kvinnheringen, utsett for eit dataangrep. Dette lamma avisproduksjonen i heile konsernet.

– Vi får oppdatert status frå konsernet kvar dag. Alle nettsakene våre er difor gjort opne ut januar, slik at vi likevel få journalistikken vår ut til lesarane. Dette står høgt oppe på prioriteringslista, forklarar Røyrvik vidare.

Har vore krevjande

Kvinnheringen har særleg merka dataangrepet ved at abonnement- og annonsesystema har vore nede. Abonnentane i alle Amedia-eigde aviser har fått varsel om at personopplysningar kan vere på avvegar, men Røyrvik har ikkje fått tilbakemeldingar om at dette har skjedd, korkje med deira abonnentar eller andre. Lønssystema deira er elles framleis råka, og dei har også mangla internett.

Å produsere papiravis har med andre ord vore særskilt tungvint, og då særleg for desken.

– Det er vi som bestemmer kva som skal stå i avisene våre og korleis sidene skal sjå ut, men det er BA som lagar dei. Når korkje våre eller deira system har fungert, har vi måtta har vi måtta improvisera. Dialogen med BA har vore fin, men det har naturlegvis vore mykje meir tidkrevjande å laga avis. Første avis blei laga ved å senda tekst og bilde på mail, no har vi funne nokre andre mellombelse løysingar, seier Røyrvik.

BA er også underlagt Amedia, noko som ytterlegare forklarar dialog-utfordringane mellom avisene.

Går rette vegen

Når Grenda er på tråden, kan det sjå ut til at Kvinnheringen går enklare tider i møte.

– Det ser ut til at abonnement- og annonsesystema er på veg opp att no. Det har byrja å skje ting, så vonleg er alle systema våre oppe og går igjen snart. Vi håpar lesarane ikkje har lagt altfor mykje merke til at vi har hatt utfordrande tider, håpar Røyrvik.

Sjølv om situasjonen har vore krevjande for dei tilsette i Kvinnheringen, understrekar Røyrvik at dataangrepet heldigvis ikkje har gått ut over hovudoppgåva deira.

– Journalistane våre har ikkje vore hindra i å vera ute for å lage journalistikk, og det er jo den viktigaste oppgåva vår. Dei tilsette har gjort ein kjempeinnsats!

– Me får vel lese om det i avisa, når alt er attende til normalen?

– Ja, det skal vi sørga for å få opplyst om, sluttar han.

Amedia om angrepet

Pål Nedregotten, data- og teknologidirektør i Amedia, har skildra angrepet som eit klassisk løysepenge-virusangrep. Konsernet skriv dette om dataangrepet på nettstaden sin:

«Amedia er førebudd på at det vil ta tid før situasjonen er heilt normalisert, og vil evaluere hendinga grundig i kjølvatnet av angrepet. Saka er politimeldt. Av omsyn til pågåande undersøkingar, politiets etterforsking og risikoen for at hackarane kan dra nytte av informasjon, kan vi ikkje på noverande tidspunkt informere meir detaljert om årsaka til angrepet. Amedia vil koma attende med kvalitetssikra informasjon så snart fakta er klarlagt, og det er forsvarleg å kommunisere desse.»

Både Kripos, Europol og Nasjonal sikkerhetsmyndighet (NSM) er kopla inn i saka.

Då fleire norske selskap har blitt råka av dataangrep den siste tida, mellom anna Nortura og Nordic Choice, behandlar Kripos angrepet på Amedia i koordinasjon med desse.

Grenda har produksjonsplattform gjennom ei anna løysing, og er difor ikkje råka av angrepet.