Psykiske lidingar aukar blant unge i Vestland

Fylkesdirektør i NAV Vestland Bjarte Hysing-Olsen uttalar seg i ei pressemelding om auken. Det legemeldte sjukefråværet i Vestland auka frå 5,6 prosent i andre kvartal 2023 til 6 prosent i år, og ligg på same nivå som gjennomsnittet for landet. Totalt utgjer fråværet i fylket 996 000 tapte dagsverk.

– Me er djupt uroa over utviklinga i psykiske lidingar hos unge. Eit lyspunkt kan likevel vera at ein stor del er lettare psykiske plager, og her veit me at arbeid har god effekt på helsa for mange. Me samarbeider med helsetenesta og arbeidsgjevarar for at flest mogleg skal finna sin plass i arbeidslivet, seier fylkesdirektør Bjarte Hysing-Olsen i NAV Vestland.

Det legemeldte sjukefråværet i Kvinnherad i andre kvartal 2024 var på 6,1 prosent, altså i overkant av snittet for Vestland fylke. Sjukefråværet utgjorde litt over 19 000 tapte dagsverk, fortel Ingunn Halvorsen, kommunikasjonsrådgjevar for NAV Vestland.

Hald kontakt med arbeidsplassen

Psykiske lidingar er også den største diagnosegruppa hjå kvinner samla sett. Hjå menn er muskel- og skjelettplager den største gruppa.

Også lokalt i Kvinnherad er det desse to helseproblema som merkjer seg ut. Av alt legemeldt sjukefråvær, er 35,4 prosent grunna muskel- og skjelettsjukdommar. Psykiske lidingar står bak 19,3 prosent av sjukefråværet i Kvinnherad.

– Det er viktig og verdifullt å halda kontakten med arbeidsplassen under ei sjukemelding. Jo lenger ein person er sjukemeld, jo større er risikoen for å ikkje kome tilbake i arbeid. Etter eitt år, ser me at rundt halvparten ikkje kjem tilbake, og i staden endar med uføretrygd, seier Hysing-Olsen.