Prøvde å setja fyr på avisbunke – politiet ynskjer tips
Tidleg på morgonkvisten tysdag tok uvedkomande avisbunken til Eurospar Rosendal med seg til parkeringshuset og prøvde å tenna på.
Publisert
Sist oppdatert
Ifølgje Eurospar Rosendal kjem avisbunken normalt sett med ferja som når Årsnes klokka 03.50. Bunken blir så levert ved inngangspartiet til Varehuset Rosendal. Men klokka 05.30 tysdag vart avisene i staden funne utanfor parkeringshuset, og det var tydeleg at nokon hadde prøvd å setja fyr.
Politioverbetjent Torgeir Fosse ved Kvinnherad politistasjon stadfestar at politiet er informert om hendinga.
Annonse
– Nokon har prøva å tenna på avisene, men det var ikkje umiddelbar fare for spreiing. Det var også små skader, for avisene ligg tett i bunken og det er vanskeleg å få fyr. Det er jo eit relativt avgrensa tidsrom dette kan ha skjedd i, og viss nokon har observasjonar, så er vi interesserte i tips, fortel Fosse. Han bed samstundes alle naboar som eventuelt har videoovervaking sjekka opptaka for det aktuelle tidsrommet.
Noko liknande skjedde om morgonen den 2. juli i år, då Elin Enes, som driv Elins Matgleder på andre sida av Skålagato, oppdaga at nokon hadde prøvd å setja fyr på eit bord.
– Om det er nokon samanheng, er umogleg å vita. Førebels held vi alle moglegheiter opne, seier Fosse.
