Programmet er klart for JuleRanchen
Førstkomande laurdag inviterer Torill Berger og Ståle Eskeland til JuleRanch på Valen.
Publisert
Sist oppdatert
Allereie under Open Ranch i september ymta Torill og Ståle frampå om at det mogleg ville bli eit liknande arrangement når det nærma seg jul. Og som sagt, så gjort. I helga inviterer dei store og små til gards.
Arrangørane lokkar med salsboder og ulike aktivitetar utover laurdagen. Mellom anna kjem både SkrotNissen, FjompeNissen og Tullebokken for å lage familieshow og spreie førjulsstemning over folket.
Annonse
Marknadstelt blir reist på ridebanen, i same område som Valen ride- og kjøreklubb vil selja rideturar. I september var dette eit svært populært tilbod, som samstundes fungerte som rekruttering til rideklubben på Valen.
Plakaten avslører elles at det blir eit breitt utval av lokale seljarar, kor ein kan finne unike julegåver, samt visuelle og etelege goder. Vaage Bryggeri tek dessutan arbeidsdagen i grisebingen på ranchen, men å slå seg ned i bingen blir øyremerkt dei over 18.
– Me håpar på å skape fin julestemning denne dagen. I tillegg til salsbodene vert det også sal av vaflar og kaffi, saft og julegraut, inviterer Prosjekt Valen.
