– Problemet er at anlegga er frykteleg dårlege
I ein lengre periode var deler av Valen, Uskedalen og Dimmelsvik utan gateljos. Vestland fylkeskommune forklarar no kva som var årsaka.
Publisert
I avisa på torsdag skreiv Grenda om manglande gateljos i tre av bygdene i Kvinnherad. Fleire lesarar har uttrykt frustrasjon over at ljosa ikkje vart fiksa, trass i at dei hadde meldt frå om feilen for ei stund sidan. Men måndag kveld var det endeleg ljos igjen både på Valen og i Uskedalen og Dimmelsvik.
Ansvarleg for vegljosa i vårt område er byggjeleiar Tommy Totland i Vestland fylkeskommune. Til Grenda kan han no fortelja kva som er utfordringa.
Annonse
– Problemet er at anlegga er frykteleg dårlege, så enkelt er det. Gateljosa har blitt reparerte nokre gonger tidlegare, men etter at dei er fiksa, så held dei kanskje eit par dagar før dei dett ut igjen, sukkar han.
Brannsløkking
At ljoset var vekke på Valen, mellom Solfeng og kyrkja, vonar han var eit eingongstilfelle. Samstundes reknar han med at meir arbeid må gjerast.
– Er det ein større jobb å få alt heilt i orden?
Annonse
– Det er nok det. Grepa vi har gjort no, håpar vi vil halda framover. Men uansett må vi gjera noko med kablinga, og det må vera neste skritt. Det vi held på med no er berre brannsløkking, fortel Totland.
– Kan ein risikera at ljoset forsvinn igjen?
– Ja, det er nok fare for det. Sjølv om vi gjorde nokre grep no, er vi framleis ikkje sikre på at det vil vara. Det kan finnast fleire feil. Hadde det vore eit enkelt problem, så hadde vi fiksa det for lenge sidan, seier byggjeleiaren.
Blant arbeid som er utført, er at dårlege armatur er bytt ut med nye. Dårlege klemmer på kablane er også skifta. I vår gjekk ein dessutan over til Led-ljos einskilde stader, noko ein har planar om å gjera fleire plassar i tida framover.
Tungvint
– Vi gjer det vi kan gjera på kort sikt. Som nemnt slit vi med generelt dårlege anlegg, og må difor treffa tiltak for å få anlegga opp på eit akseptabelt nivå. Brannsløkking kostar pengar, og det er veldig tungvint å driva feilsøking. Vi kan gå i dagevis utan å finna feilen, opplyser Tommy Totland.
Annonse
Han forstår frustrasjonen til innbyggjarane, men har ei oppmoding å koma med. Om noko han meiner kan vera hjelp til sjølvhjelp.
– Eg er veldig takknemleg viss folk kan melda frå om feil via nettportalen til fylket. Då går meldingane også rett til entreprenøren vår, og det skal gå raskare å få feilen ordna.
