– Prisen steig i dag

Prisen på ein køyretime er såleis oppe i 745 kroner frå og med 15. mars, noko som gjer denne køyreskulen til den rimelegaste i Sunnhordland. Ein køyretime klasse B ligg på 750 kroner hos både Invia og Sunnhordland trafikkopplæring.

– Med denne auken har vi tatt høgde for at dieselprisen kjem opp i 30 kroner. Men prognosane viser at prisen på drivstoff vil koma opp i 40 kroner literen. Dersom det skjer sel vi dieselbilane våre og går over til heilelektrisk. Det kan du sitere meg på, seier Hogne Kvistad Gjuvsland i Husnes trafikkskule til Grenda.

Konkurrentane deira har alt heva prisen med 25 kroner. Grunnen til at Husnes trafikkskule ikkje har auka prisen meir er fordi dei meiner at alle må dra lasset i lag.

– Stig vi for mykje går det ut over kjøpekrafta, og dette med høge prisar gjeld jo for oss alle. Det er heilt hårreisande kor staten Norge håvar inn pengar på drivstoff, held han fram.

Heilelektrisk tvingar seg fram

Prisauken har ikkje vore tema blant dei som køyrer eller betaler for køyretimane, men konsekvensen er at mengdetrening med manuell gir blir dyrare.

Då stadig færre har bil med manuell gir heime, er enkelte køyreskuleelevar nøydd å øvelseskøyre med trafikkskulen for å få førarkort som gir dei rett til å køyre manuelt. Gjuvsland meiner difor at den beste løysinga er å kjøpe ein billig manuellbil, for slik å få unna meir av mengdetreninga privat.

Men også valet mellom manuell og automatgir er i endring. No går nemleg 40% av køyreskuleelevane direkte på automatgir.

– Vi har ein Tesla, men det går meir og meir over mot el-bil. Vi får ikkje tak i nye manuell-bilar med pedalsett, så automatgir vil jo uansett tvinge seg fram, seier Gjuvsland.