Pride sette farge på Husnes sentrum
I helga vart Pride Kvinnherad 2021 markert på Husnes. Hogne Kvistad Gjuvsland i arrangørkomiteen stod for appellen, og det etter kvart så våte publikummet såg ut til å trivast i det følgjande regnbogetoget.
Publisert
Sist oppdatert
– Vi som jobbar tett med ungdommar veit kor mykje press dei har på alle plan, og kor viktig det er at vi vaksne viser dei gode haldningar og er gode forbilde, proklamerte ein fargerikt dresskledd Gjuvsland frå paviljongen i Husnesparken laurdag ettermiddag.
Han haldt fram med å peike på at utviklinga i Europa går feil veg:
Annonse
– Nokre land har dødsstraff mot homofili, og i andre land kan ein få lange fengselsstraffer – berre fordi ein blei forelska i feil menneske! Då har ikkje Pride-rørsla utspelt si rolle, og kampen er framleis svært viktig. Kva kan vi gjera? Jo, me kan endra kvardagen til dei som bur her, og ikkje minst visa kvarandre og andre utanfor at vi står saman og støttar retten til å elska kven ein vil. Det skal vera trygt å finna identiteten sin i Kvinnherad. Og me skal vera føregangskommune i Norge, Europa og ja, heile verden, appellerte han vidare, til anerkjennande nikk frå dei mange som hadde møtt opp.
Symbolsk støtte
Blant dei som deltok på markeringa var Geir Yven og Torunn Fjellhaugen. Dei meinte markeringa var viktig å støtte, ikkje berre for Kvinnherad eller Noreg, men som symbolsk for befolkninga i resten av verda òg.
– Dette er heilt knall topp. I fjor var eg bortreist og fekk ikkje vera med, men elles har eg vore med å feira Pride I mange år. Det er eit heilt fantastisk arrangement, og det er kjempeviktig å vise symbolsk støtte, både for dei som er her, men også for folk i andre land, poengterte Yven engasjert med eit regnbogeflagg i handa.
Annonse
Han understreka dessutan at han var stolt over arbeidsstaden sin, Hydro Husnes, som hadde hatt Pride-flagget til topps heile juni månad. Dette såg han som ein viktig gest som viste til at arbeidsstaden stadfesta si haldning til mangfald og inkludering.
Då appellen var unnagjort samla publikum seg i eit tog som traska etter ein bil som sette stemninga med særskilt utvalt musikk for høvet, der mellom anna YMCA av Village People strøyma ut or høgtalarane. Til vaiande flagg og tendensar til allsong vandra det fargerike toget gjennom Husnes sentrum, for å markere si støtte til identitetsmangfald og retten til å elske den ein vil.
Arrangørkomiteen bestod, forutan Hogne, av Tonje Gravdal, Kent Are Kjørsvik, Petterson, Jorun Kvistad Gjuvsland, Tuva Holmedal Gjuvsland og Gunnhild Haugland.
