- Potensialet er større enn vi anar

Rapportane er eintydige; det er enormt med turistar i Kvinnherad i sommar. Og kanskje er dette berre starten. Det trur i alle fall ordførar Hans Inge Myrvold, som vil løfta fram reiselivssatsinga i det komande budsjettarbeidet.

 

I fleire artiklar i Grenda, både i dagens utgåve og i føregåande aviser, vert det tydeleg dokumentert at tilstrøyminga av turistar er rekordarta i år. Næringslivet og turistattraksjonane si usikkerheit grunna koronapandemien og reiserestriksjonane, er blitt erstatta av optimisme, enorme besøkstal, høg omsetning, men òg svært travle dagar.

– Dette er berre starten på ein standard som vil vera med oss i tida framover også, vurderer ordførar Hans Inge Myrvold når han møter avisa til ei oppsummering av situasjonen måndag føremiddag.

 

Nasjonalparken

Det er meldt om svært mange gjester over heile Kvinnherad. Utanom Rosendal, er det nok Mauranger og Bondhusdalen som har opplevd det aller største rushet. Myrvold ser det difor som naudsynt å sjå nærare på stoda rundt Folgefonna.

– Vi må, saman med dei andre vertskapskommunane til Folgefonna nasjonalpark og nasjonalparkstyret, setja oss ned og snakka om denne utviklinga. Det gjeld ikkje berre Bondhus, men også dei andre inngangsportane til nasjonalparken i Ullensvang og på Etne-sida. Vi må samordna og koordinera oss litt, analyserer han.

Det er til dømes ikkje utenkeleg at det vert innført parkeringsavgift på Bondhus.

– Vi får sjå litt nærare på det. Det er jo ei utvikling kommunen har snakka litt om, og så får vi berre finna dei gode løysingane, seier Myrvold.

 

Knipe med ressursane

Formannskapet sette i vår av midlar til koronatiltak i reiselivet. Noko av pengane vart nytta til parkeringsvakt/turistvert i Sunndal og turistvertar/hamnevertar på Husnes og i Rosendal. Ordninga er truleg kome for å bli.

– Eg ynskjer at vi må utvikla dette vidare, også når vi kjem attende til ein normal kvardag utan korona. Det er viktig for Kvinnherad å møta dei tilreisande på ein god måte, så dette er eit konsept som bør vidareutviklast, seier Hans Inge Myrvold.

Korleis Kvinnherad skal driva som reiselivskommune vert tema for politikarane utover hausten.

– Når vi no skal i gang med budsjettarbeidet, må vi finna ut kva standard vi skal setja for neste år, og sjå i kva grad rolla som turistkommune vert fylt med nok ressursar. Det har vore ganske knipe med ressursane tidlegare. Turistinformasjonen har vore styrt med avgrensa midlar, så vi må sjå korleis vi kan disponera dette framover, seier Myrvold.

 

Konkurrerte med Lofoten

Ein viktig del av diskusjonane blir nok parkeringsplassar og toalett, eller snarare mangelen på det.

– Vi må vurdera om vi skal gå inn med investeringsmidlar, slik at vi kjem på opp eit nivå som er tilfredsstillande. Det er veldig fornuftig å ta den debatten no når vi skal i gang med budsjett og investeringsplan, men det er litt synd at reiselivsplanen vart utsett. Eg vonar å få landa den i løpet av hausten. Klarar vi å få den brikka på plass, så er vi endå betre rusta til neste år, sjølv om det så langt i år har gått over all forventning, meiner Myrvold.

I eit innlegg til politikarane nemnde kommunedirektør Ragnhild Bjerkvik spesielt Rosendal, og sa at bygda i år skal kjempa om turistane mot Lofoten og dei andre store turistmåla. Den kampen tykkjer ordføraren at både Rosendal og resten av Kvinnherad har takla veldig bra.

– I høgste grad. Det er veldig gledeleg at vi er ein så attraktiv destinasjon for så mange. Alle eg møtte i Bondhusdalen kommenterte kor flott det er der. Dei fleste ville gjerne sjå resten av kommunen også. Spesielt Baroniet vart nemnt som eit interessant mål, men også Halsnøy kloster vart trekt fram, seier Myrvold.

 

Bindeledd

Mange har gjennom åra hevda at potensialet som reiselivsdestinasjon har vore dårleg utnytta. Årets sommar viser kanskje kva potensiale som faktisk ligg der. Den tanken er Myrvold samd i.

– Dette er berre byrjinga. Eg trur nordmenn i større grad vil feriera heime i tida framover. Kvinnherad ligg dessutan bra til som eit bindeledd mellom indre og ytre del av regionen. Kvinnherad er òg innfallsporten til andre kommunar, særleg Ullensvang. Men vi bør prøva å skapa meir opplevingar basert på turisme, og gjerne laga eigne konsept, slik Ullensvang har gjort med til dømes sidercruise. Kommunen skal vera veldig behjelpeleg med å leggja til rette for den typen næringsaktivitet, lovar Myrvold.

– Potensialet er større enn vi anar, slår han fast.