Postvegtrasé blir flytta

I ein e-post til kommunen spør Vegvesenet om ei avklaring knytt til Postvegen og om omsynssona for bevaring av kulturmiljø der Postvegen ligg blir vidareført frå gjeldande kommuneplan til ny kommuneplan og reguleringsplanar.

I eit svar frå kommunen skriv planleggjar for offentlege planforslag, Anne Lise Næs at det er planlagt å leggja om delar av Postvegen.

På gjevne vilkår

– Eitt nytt fortau skal erstatte Postvegen gjennom store delar av området. Sidan det hastar å få etablert del av vegen inn i området, så har det vorte fremja dispensasjonssak før planen er vedteken, seier Næs.

– Kvinnherad forvaltingsutval gav dispensasjon frå arealføremålet grøntområde i gjeldande reguleringsplan til bygging av mellombels anleggsveg, men på gjevne vilkår, fortset ho.

Det må mellom anna etablerast ei mellombels løysing for turgåarar i området som knyt Postvegen saman og som ikkje hindrar ferdsel i området under anleggsperioden.

Løysinga skal vera på plass når arbeidet med den mellombelse anleggsvegen startar opp, og skal gjerast med minst mogeleg inngrep og sikrast mot anleggsområdet. Samtidig vil ein då også unngå at turfolk tek seg inn på anleggsområdet for å nytta den gamle turvegen.

Næs understrekar at planarbeidet framleis er i prosess, og at det truleg vil koma justeringar på plankartet før det blir lagt fram til politisk behandling og ut på høyring.

Ikkje original

Leiar for Interesselaget Postvegen Ove Tvedt kan forklare at denne delen av Postvegen ikkje er original, og at dei difor ikkje ser flytting som noko problematisk.

– At den grøne næringsparken kjem der og er ein del av det grøne skiftet må me vera glade for. Det viktigaste for oss reint postvegmessig er at det er trasear som knyt saman desse stubbane som faktisk er originale. Når ein kjem gjennom der så er det greitt for oss, uttalar Tvedt.

– Det er klart at det ikkje er noko koseleg med asfaltert område, men det viktigaste er trass alt at dei originale delane vert knytt saman. I dag så må du jo gå langs anleggsvegen gjennom SIM, det er jo ikkje noko nostalgi i det heile, men du kjem fram, legg han til.

I fylgje Tvedt er det noko heilt anna som utgjer ei større utfordring for Postvegen.

– Den største utfordringa er vatn, gjengroing og bjørnebær. Når me ryddar på den eine sida, så veks det i alle fall der, ler han noko oppgitt avslutningsvis.