Postkassetrimmen legg ned

Postkassetrimmen har blitt meir og meir populær dei siste åra, og finst no mange stader over heile landet. Her i Kvinnherad er appen teken i bruk av både Kvinnherad turlag, Uskedal idrettslag, Omvikdalen idrettslag, Rosendal turnlag, Hatlestrand og Ølve turlag, og Mauranger bygdalag. Desse organisasjonane har i to omgangar fått tilskot frå Sparebank1-stiftinga Kvinnherad til å betala for driftskostnadane.

Appen vart utvikla av Mats Byrkjeland (30), opphavleg frå Norheimsund, men no busett i Oslo. Han nytta slagordet «Gjer fjellturar endå kjekkare». I 2020 vart Byrkjeland tildelt eldsjelprisen i Kvam for innsatsen.

«Juryen meiner Postkassetrimmen er eit knakande godt initiativ som har fått hundrevis av personar til å traska og trø på kjende og ukjende stader. Appen er laga med frivillig arbeid. Den er gratis å bruka og utan reklame», skreiv juryen ifølgje Hordaland Folkeblad.

På fritida

Men no har Byrkjeland bestemt seg for å leggja ned Postkassetrimmen. Appen vil fungera fram til vår/sommar neste år, men så er det slutt.

«Postkassetrimmen er noko eg, Mats, har drive på fritida sidan 2017. Eg har over ei god stund kjent på at eg ikkje har kapasitet nok til å halde fram. Det er mykje arbeid som krevst for å halde appen ved like. Å behandle fjellforslag og svare på e-postar er ein del, men eg må òg vedlikehalde kode for app og server, overhalde krav frå Apple og Google, drive føretak og føre rekneskap, og sikre at informasjonssikkerheita er god, for å nemne noko», skriv han i ei melding på appen si heimeside.

Han nemner også personvernproblematikken.

«Som brukar av Postkassetrimmen legg ein igjen geografiske spor og annan persondata, og det er strenge lovkrav for dette. Det krev tid og arbeid å forvalte dette ansvaret på ein god måte», opplyser Mats Byrkjeland, og slår fast at det har vore veldig kjekt og lærerikt å utvikla og driva Postkassetrimmen.

Neppe sal

Han fortel elles at fleire lurer på om appen kan seljast eller overtakast av andre.

«Det er ikkje noko eg kjem til å jobbe for å få til. Å overta ein app med tilhøyrande kode og baksystem er ikkje enkelt. Dessutan er Postkassetrimmen hjartebarnet mitt, og eg må ærleg seie at det ville vore vanskeleg å gje det frå seg. Nokon lurer på om det ville hjelpt å ta betalt for appen. Det ser eg ikkje som ei løysing, då eg ikkje ynskjer å gjere eit levebrød av Postkassetrimmen. Å ha betalande kundar medfører fleire krav og større ansvar», kommenterer Mats Byrkjeland.

«Eg er utruleg stolt over å ha laga Postkassetrimmen og sett kor mykje glede det har skapt. Eg håpar turgleda dykkar består. Fjella kjem i alle fall til å stå», avsluttar han.