Populær tursti kan snart få eit realt løft

– Det har vore mange år med arbeid, smiler Stine Hatteberg.

Ho var tidlegare med i Rosendal bygdelag, men er no med i prosjektet som nabo av Svartedalen.

Jobben med å rusta opp den populære turstien som knyt Malmanger, Skeishagen og Seim saman har vore lang, men aldri før har spaden vore så nær med å kome i jorda. No er både underskrifter frå grunneigarar henta inn og ein omfattande søknad sendt til kommunen.

Hatteberg, som har hatt Morten Nygård, leiar i turgruppa i Rosendal turnlag, med seg i bresjen for prosjektet, fortel at dei to er langt ifrå åleine om arbeidet.

– Tormod Fossheim, som har god og lang erfaring med søknadsprosessar i kommunen, var svært positiv då vi kontakta han for hjelp.

Fossheim er pensjonert frå planavdelinga i kommunen, og driv i dag sitt eige konsulentfirma.

– Han tilbudde seg å gjera denne jobben på dugnad, og han har gjort ein strålande innsats med det formelle i tursti-prosjektet. Det er vi svært takksame for, fortel den engasjerte prosjektleiaren.

Ho legg til at Hans Olav Leganger i Leganger Maskin òg har hatt fleire synfaringar på staden, og har engasjert seg i prosjektet frå start.

– Han har god kontroll på den praktiske biten av prosjektet, og også han har vore til uvurderleg hjelp.

Etterlengta

At arbeidet med stien er både nyttig og ønskeleg, har prosjektgruppa heilt klart fått erfart.

– Stadig er det folk som spør meg korleis arbeidet går. Det er mange av lokalbefolkninga som nyttar seg av denne stien, og mange som vil ha stor glede av at den no snart vonleg kan rustast opp. Her går det både gamle og unge turgåarar, men spesielt tenker vi på dei barna som brukar Svartedalen som skuleveg. Då er det ekstra kjekt at den kan vera både trygg og tørr, legg Hatteberg til.

I årevis har nemleg stien vore blaut. Arbeidet med utbetringa skal hindra at flaum øydelegg både sti og steingarden som er der.

– Svartedalen har nesten ikkje vore framkomeleg dei siste åra, både grunna vasskadar og tilgroing, så dersom vi får gjort noko no vil det vera heilt fantastisk. Stien til Malmangernuten går også opp hit, og for oss i turgruppa er arbeidet spesielt viktig ettersom mange av turistane som skal til Malmangernuten går denne vegen, skyt Nygård inn.

Mange års arbeid

Hatteberg tok over som prosjektleiar for to år sidan, men arbeidet med å få stien rusta opp starta lenge før dette. Allereie på slutten av 80-talet jobba turgruppa i Rosendal turnlag med å få gjort noko med turstien. Seinare har også Kvinnherad kommune hatt eit forsøk, i samband med at det skulle leggast ny vassleidning i Svartedalen.

– At vi no, etter så mange år, endeleg er så nære med å realisera prosjektet, er utruleg kjekt. Vi er mange som har lagt ned tallause timar i dette, og no håpar vi at vi kan bli ferdige til våren allereie, seier Stine Hatteberg.

Sjølv om startskotet for arbeidet først går når søknaden er handsama, og arbeidsgruppa eventuelt får grønt lys frå kommunen, har Hatteberg allereie tillate seg å lage ein liten plan for korleis ei framtidig opning av stien kan feirast.

– Då må det bli eit løp. Kvinnheradløpet med den gamle ruta, og alle som vil skal få bli med og springa, smiler ho slik at det nesten kan høyrast gjennom telefonen.

– Vedlikehald er alfa og omega