Polsjefen om nyopninga: – Dette er stas!
Butikksjef Vibeke Agledal gler seg storleg over at Vinmonopolet har kome seg skikkeleg inn i varmen på hovudsenteret.
Publisert
Sist oppdatert
Lokalet er kanskje ikkje så mykje større enn det dei forlét, men det har likevel ei heilt anna framtoning, tykkjer leiar ved Vinmonopolet på Husnes Vibeke Agledal.
– Me har fått ein meir oversiktleg butikk, og han er utforma på ein måte som gjer det lettare for kundane å finna fram, enn slik det var før. Det er det viktigaste for oss, smiler ho.
Annonse
Hektisk flytting
Fredag kunne dei invitera kundane tilbake på handel, etter at Agledal og hennar kollegaar hadde stått på seint og tidleg for å koma i mål med parallellforskyvinga over i hovudsenteret på Husnes.
– Det har vore hektisk. Då me stengte etter opningstid førre laurdag, fekk pakka ned det meste utover ettermiddagen. Måndag braka det laus med flytting frå Kvadraten og inn i lokalet her, forklarer Agledal.
Vinmonopolet har eigne folk til å setja opp hyllene og innreiinga, men dei tilsette ved Husnes-utsalet har fått alle flasker og kartongar på plass i hyllene.
Annonse
– I dag må me også bruka litt tid sjølve også for å bli kjent med både butikk og system, huska kor me har gjort av alt og så vidare, seier butikksjefen.
Vore med frå starten
Dagen vart opna med både kake og smaksprøvar, alkoholfrie vel å merka.
– Kjekt å få visa fram noko av det me har i sortimentet. Det gjekk unna, både med kake og drikke, vurderer Agledal.
Einaste som hikka litt denne dagen var dei automatiske dørene, som var meir interesserte i å sleppa kundar ut enn inn.
– Me får ha dei opne til me finn ut av det, er den pragmatiske innstillinga til dei tilsette.
Annonse
29. november 2001 opna Vinmonopolet på Husnes, så utsalet hadde vore i same lokale i 21 år, fram til i dag.
– Me blir revitalisert av å koma oss over i senteret her, side om side med så mange butikkar. Dette gir oss eit løft, seier Agledal som saman med Kari Røstbø har hatt Vinmonopolet avdeling Husnes som arbeidsplass sidan opninga i 2001.
– Sjølv om me ikkje er avhengige av å vera i straumen slik ein er her – dei som vil handla på polet finn jo polet, så løftar det oss, og eg trur det vil løfta senteret også, meiner ho.
I løpet av dei 21 åra som Vinmonopolet har hatt utsal i Kvinnherad, har Agledal merka ein tydeleg endring i drikkevanane til kvinnheringane.
– Me sel mykje meir vin no enn me gjorde i starten. God mat med tilhøyrande drikke er blitt ei interesse for mange, og me har også merka at kvinnheringane reiser meir og tar med impulsar heim frå utlandet. Det viser igjen på vårt sal, sluttar Agledal.
