Poll til poll-tunellen: – Håpar på oppstart i 2026
Fleirtalspartia har blitt samde om Vestland fylkeskommune sitt budsjett. Partia ynskjer fortgang i prosjektet med å byggja tunell mellom Austrepollen og Nordrepollen, i tillegg aukar dei fondet til vedlikehald av vegane.
Publisert
Måndag ettermiddag sendte Sp, Ap, KrF, MDG, SV og V ut ei pressemelding om at dei har blitt samde om 2025-budsjettet for Vestland fylkeskommune.
«Vi har landa eit ansvarleg budsjett, som i stor grad sikrar vidareføring av tenestene med moderat prisauke, grøne satsingar, inflasjonsjusterte driftstilskot på kultur og sterk satsing på vidaregåande opplæring», skriv partia.
Annonse
Høgast rasfaktor
Nokre viktige prioriteringar blir trekte fram i pressemeldinga. Ikkje minst pengar til fire store fylkesveginvesteringar i åra som kjem: Heilevang, Tokagjelet, Poll til Poll og Atløysambandet. Sigrid Brattabø Handegard (Sp) kan fortelja meir konkret kva dette betyr for Poll til Poll-prosjektet.
– I budsjettet har vi lagt inn 40 millionar i oppstartmidlar i 2026. Det som er viktig for oss, er trygge og tenlege kvardagsvegar. Tokagjelet og Poll til Poll er blant strekningane med høgast rasfaktor i heile Vestland fylke. No ynskjer vi å setja raspengane frå staten i arbeid, og det er viktig å få framgang i planarbeidet, seier ho til Grenda.
– De tenkjer fysisk oppstart i Mauranger i 2026?
Annonse
– Ja, vi har forventningar til at det skal skje. Eg håpar det er realistisk, sjølv om det er mykje planlegging som skal gjerast fyrst, og såleis for tidleg å seia når spaden vert sett i jorda. Vi må også arbeida opp mot staten for at dei skal vera med og delfinansiera prosjektet. Fylket går inn med 50%, og så meiner vi staten må dekka sin del sidan tunellen også er ein del av armen til Bergen, fortel Handegard.
Varaldsøy
Fleirtalspartia er elles samde om å vidareføra vedlikehaldsfondet for fylkesvegane. Det vart oppretta i 2023 og gjaldt for perioden 2023-2025. Den gong vart det sett av 500 millionar kroner på fondet. No vert det supplert med 280 millionar for åra 2026 og 2027.
– Også dette handlar rett og slett om å få på plass trygge og tenlege kvardagsvegar. Vi får kanskje ikkje nokon autostradaer, men litt breiddeutviding og å fjerna ein nabbe her og ein nabbe der, samt nytt dekke. Kvinnheradpakken med strekninga Austrepollen til Årsnes er stjerneeksempelet på kva ein kan få til. Det var nok litt skepsis då fondet vart oppretta, men tilbakemeldinga frå fylkesadministrasjonen no er at det har vore ei veldig god ordning, opplyser Sigrid Brattabø Handegard.
Fondet kjem i tillegg til dei ordinære vedlikehaldsmidlane, og skal bidra til føreseielegheit i planlegging, og praktisk vegvedlikehald med strekningsvise tiltak.
Fylkespolitikarane har for tida også oppe ei sak om utbetring av ferjekaiar i samband med nye ferjeanbod frå 2030. Handegard fortel at ho i den samanheng har spelt inn ny ferjekai på Varaldsøy, og lovar å følgja opp den saka.
