Politisk engasjerte elevar ved Undarheim skule
Onsdag var det duka for ein politisk dag ved Undarheim skule. Elevane i 7. klasse fordelte seg på standar, og representerte kvar sitt politiske parti. Fredag skal elevane ved skulen få røysta ved skulevalet.
Publisert
Sist oppdatert
Denne onsdagen osa det av kreativitet og politisk interesse på Undarheim skule. Elevane i 7. klasse var fordelte i grupper for kvart politiske parti. Kontaktlærar Karina Almeland Sjo stod på sidelinja, og var både overraska og stolt over kva elevane hennar hadde lært på berre to veker.
– Me har jobba med politikk, då me ynskjer å førebu dei på korleis valsystemet fungerer, og samstundes auka interessa blant elevane. Dei har mellom anna spelt eit spel som går gjennom dei forskjellige partia, korleis røysting fungerer og det generelle systemet i regjeringa.
Annonse
Hovudtema for kvart parti var klima, skule og jobb. Og det var kun fantasien som sette grenser for korleis dei skulle hanka inn røyster.
– Me slapp dei laus, og no styrer dei seg sjølve. Det er morosamt å sjå at dei har forstått at det krev litt for å få røyster. Difor lokkar dei med både det eine og det andre, ler Sjo.
Og det hadde elevane verkeleg skjønt. Rundt om på standane fann ein både snop, perleband, bakst og overbevisande replikkar. Sistnemnte kom Raudt med på løpande band.
– Partiet Raudt står for svært viktige saker, og viser at fellesskapet fungerer. Dei meiner mellom anna at det bør vera gratis tannlege til du er 25 år, og ikkje minst leksefri skule då det stel fritida vår. Dette er eg einig i. Eg har heller lyst på lengre skuledagar, fortel Eline Bjørke-Lijodstveit (12).
Annonse
– Me har øvd ein god del på politikk, og det er faktisk veldig interessant og kjekt, skyt Elena Marie Ingvaldsen (12) inn.
Framfor Arbeiderpartiet sin stand stod Malvin Mehl Prestnes (8). Han går i 4 klasse, og denne karen har allereie bestemt seg for kva parti han skal røyste på under skulevalet.
– Me såg ein film om dei ulike partia i klasserommet, og då Arbeiderpartiet sa kva dei kunne gjere for oss i landet, bestemde eg meg for å røyste på dei, smiler Malvin.
Fredag vert det skuleval for elevane ved Undarheim skule. Det partiet som får flest røyster, får bestemme, slik det verkeleg er.
– Dei får bestemme neste prosjekt me skal ha i klassen, og då må dei gjere som Erna, å høyra med resten av regjeringa før dei tar ei avgjersle, blunkar lærar Sjo.
