Politikarane: – Opptekne av innbyggjarane

I nesten tre timar stod turnuskonflikten på programmet til formannskapet.

Torsdag ettermiddag møttest formannskapet til eit ekstraordinært møte. Berre éi sak stod på saklista.

– Det vart fremja krav om eit ekstraordinært formannskapsmøte frå fleire av medlemmene etter medieomtalen av denne saka. Men vi har berre lagt opp til ei orientering i dag. Formannskapet skal ikkje fatta noko vedtak, understreka ordførar Hans Inge Myrvold (Sp) innleiingsvis.

Hilde Enstad (Ap) nytta høvet til å stilla spørsmål.

– Er det ikkje rett at når ein ikkje kjem fram til ein avtale, då er det arbeidsmiljølova som blir lagt til grunn, og at dei tilsette skal ha turnus som er nøyaktig 35,5 timar per veke i ei 100 prosent stilling? undra ho.

Jurist Kim Gundersen var ikkje heilt samd.

– Det stemmer at om ein ikkje har ein avtale så må ein basera seg på arbeidsmiljølova sine reglar, eventuelt tariffreglar. Men verken arbeidsmiljø- eller tarifflova seier noko om talet vakter, opplyste han.

Leiarnivå

Ove Lemicka (Frp) var oppteken av å gjera innsparingar på leiarnivå i staden for i tenestene.

– Kva er det vi gjer i kommunestyret viss vi vedtek at vi ikkje skal endra bemanningsnorma, men så gjer ein det likevel? Eg har tidlegare spurd etter eit kart over leiarnivå med funksjon, og gjerne namn, slik at det er mogleg for oss å danna eit bilete av kvar det er mogleg å gjera innsparingar, sa han.

Det fekk sektorleiar Bjørg Wangensten til å gje følgjande kommentar:

– Skal vi gje meir fri, så vil vi mangla vakter. Eg tenkjer at vi fyrst og fremst er her for innbyggjarane, det er veldig viktig.

Hege Lægreid Røssland (SF) kontra:

– Kjekt å høyra at ein er oppteken av innbyggjarane, det er vi som politikarar òg. Men vi synest denne konflikten er uheldig, sa ho.