Politikar usamd i Kvinnherad Arena-reduksjonar

– Kommunedirektøren viser til eit pålegg frå kommunestyret om tilpassingar/reduksjonar, noko eg ikkje utan vidare er einig i eller meiner er vedteke. Slik eg har forstått det legg administrasjonen etter ein gjennomgang av prosjektet opp til å redusera kostnadene ved å endra og redusera innhaldet i byggeprosjektet, innleiar Lemicka i brevet til ordførar Hilde Enstad.

Redusert kapasitet

– Eg har ikkje den fulle oversikten over endringane, men forstår at det vert lagt opp til å redusera tribunekapasiteten med om lag 750 tilskodarplassar. Dette medfører at hallen ikkje lenger kan skipa til nasjonale kampar, noko eg meiner ikkje er i samsvar med føresetnadane og tilskota som Sparebankstiftinga har ytt til prosjektet, melder Lemicka vidare.

Han skriv at han forstår òg at ein vil spara nokre hundre tusen på å endra eller redusera kvaliteten på golvet i arenaen.

– Det er noko som vi veit har vore problem med andre hallar som har hatt golv som er skadeleg for spelarar, og som har blitt skifta av slike grunnar. Eg meiner i tilfelle at ein må sikra seg uavhengig dokumentasjon på at skifte av golv ikkje vil ha negative bruks- eller vedlikehaldskostnader. Uansett meiner eg at vi bør unngå å svekka hallprosjektet for marginale innsparingar på eit så stort og viktig prosjekt. Og at om dette skal endrast, er dette avgjerder som politikarane må handsama og godkjenna, skriv Lemicka i brevet og spør ordføraren om ho ta tak i dette straks, og eventuelt leggja til rette for at det blir sak om endringane.

Drøftar endringar

Til Grenda svarer ordførar Hilde Enstad (Ap) at kommunedirektøren skal gje ei orientering til kommunestyret 28. oktober.

– Ein ser på korleis ein kan nytta midlane best mogeleg. Desse endringane har vore gjenstand for drøfting i styringsgruppa, og gruppa har gitt si tilslutning til forslaga som var lagt på bordet. Ein ser på kva det er som er som utløyser spelemidlar, som er endringar ein ikkje rører, og kva ein kan leggja inn som opsjonar, som me kan gjera seinare, forklarer Enstad.

Ho meiner det det er fornuftig at kommunestyret blir kjent med vurderingane som er gjort i styringsgruppa, og så følgja opp med enten gje si tilslutning til det eller eventuelt auka løyvingane for å gjera det på ein annan måte.

– Kommunestyret må ta stilling til vegen vidare. Om det er meir eller mindre pengar, får ein ta i kommunestyret. Ove får det han spør om, men ein går ikkje inn i noko debatt på førehand. Sjølv syns det er bra at ein følgjer med og stiller spørsmål undervegs, og så syns eg det er fair at kommunedirektøren svarer på desse spørsmåla til eit samla kommunestyre, sluttar ordførar Hilde Enstad.