Politiet meiner at trestokk vart brukt som drapsvåpen

I eit fengslingsmøte fredag morgon vart den 47 år gamle mannen som er sikta for å ha teke livet av Renate Strand Normann på Varaldsøy 22. april fengsla i fire nye veker.

Retten peikar på at nye opplysingar som har kome fram i etterforskinga styrkar mistanken mot den sikta.

– Retten viser her særleg til den førebelse obduksjonsrapporten, står det å lesa i kjenninga frå Hordaland tingrett.

Trestokk

Politiet har så langt avhøyrt 20 personar om saken. I kjenninga kjem det fram at det særleg er eit vitne som kjem til å bli sentralt.

Det vitnet hevdar å ha sett den sikta slå den avdøde fleire gongar med ein lang «stav». Retten peikar vidare på at det samsvarar med den førebelse obduksjonsrapporten, som konkluderer med at skadar på hovudet er dødsårsaka.

I ei pressemelding 24. april skreiv politiet at dei hadde teke beslag i ein gjenstand dei trudde var drapsvåpenet. I kjenninga frå Hordaland tingrett kjem det fram at dette skal vera ein trestokk.

– Ut i frå funn på stokken og vitneforklaringar, framstår det mest sannsynleg at stokken vart brukt til å slå den fornærma i hovudet, skriv retten.

BT: Skal undersøka om drapssikta er tilrekneleg

Nektar straffskuld

Til Bergens Tidende seier mannens forsvarar, Jørgen Riple, at den sikta har eit svart hol i hukommelsen, og ikkje hugsar dei sentrale sekunda.

– Ifølgje politiet er det blitt brukt ein gjenstand. Han kjenner til denne, men kan ikkje hugsa å ha brukt den. Men han registrerer at gjenstanden blei funnen på ein stad kor den ikkje låg tidlegare på dagen, så han skjønner at den har blitt brukt til noko, seier Riple til BT.

Den sikta nektar straffskuld, og hevdar at skadane truleg har skjedd etter eit fall. Hordaland tingrett la inga vekt på hans forklaring. Dei peikar heller på at gjentakingsfaren for alvorlege valdslovbrot er nærliggande, konkrete og reelle, og varetektsfengsla den sikta i fire nye veker.