Politiet godt nøgde med Festidalen-helga

– Det har vore ein flott festival frå vår side, og stemninga har vore god trass det dårlege vêret. Det er tydeleg at det har vore fest og alkohol i helga og me har fått ein del klassiske småmeldingar, men ingen alvorlege ting, sa politioverbetjent Torgeir Fosse.

– Det har i alle fall ikkje vore nokre meldingar frå politiet si side, men me hadde mannskap ute i tillegg til vakthaldet som Festidalen sjølv stilte med. Det blei som sagt nokre klassiske meldingar med folk som har vore påverka. Til dømes var det ein som hadde vore for full, det var ein som var misnøgd med vaktene og éin som var sakna ein liten periode, fortsette Fosse.

Grensa nådd

Men også utanom Festidalen merka politiet at det har vore fest og moro kringom kommunen.

– Me fekk også nokre meldingar spreidd rundt i kommunen om rusa personar, høg musikk og generell forstyrring av nattero. Spesielt var det éi adresse der det var gjentekne utfordringar med støy nattetid. Dei har fått beskjed om at me no har nådd grensa for kva som kan aksepterast utan at det vil føra til noko meir. Dette skal me fylgja opp denne veka, avslutta Fosse.