Politiet forklarte kva som møtte dei

Onsdag starta rettssaka der ein 48 år gamal mann er sikta for å ha drepe 42 år gamle Renate Strand Normann. Første dag var prega av prosedyrar frå aktor og forsvarar, samt forklaringar frå to av dei tre krimteknikarane som var på Varaldsøy og gjorde tekniske undersøkingar på staden der Normann vart funnen død.

Tannlegeskrekk

Også tiltalte, ein 48 år gammal svenske, gav si forklaring på slutten av opningsdagen i tingretten.Han forklarte inngåande om livet sitt, inkludert korleis det hadde seg at han enda opp med å bu på Varaldsøy, og samt korleis dagen hans 21. april 2021 skreid fram.

Dagen inkluderte reising frå Varaldsøy til Husnes for å trekkja to tenner hos tannlegen, og også korleis han reiste tilbake til Varaldsøy. Felles for begge bussturane mellom Årsnes og Husnes var at Renate Strand Normann gjekk på bussen i Uskedalen. Normann og 48-åringen tok ferja saman til Varaldsøy og gjekk i lag til hans bustad.

Frå å ha hatt det triveleg i lag, fortalte tiltalte at stemninga snudde. Han var trøtt og sliten etter tannlegeturen, som mellom anna inkluderte fleire rundar med bedøving før tanntrekkinga, noko som røynte på for ein med tannlegeskrekk.

– Eg ville gå og leggja meg, ho ville ha ein slags fest. Eg jaga ho ut av huset, sa han om det som vart opptakten til dei fatale slaga med stokken.

I forklaringa si seier 48-åringen at Normann slo han i hovudet først med ein stokk, og at han vart fortumla etter dette. Tidlegare på opningsdagen hadde kriminalteknikarane svara på spørsmål om det vart funne skadar på tiltalte som kunne vera påførte i forkant av situasjonen som enda med at Normann døde. Det avkrefta kriminalteknikarane. Tiltalte hadde inga forklaring på kvifor han ikkje hadde skadar sjølv etter slaga.

Politiet på plass

Under andre dag i retten heldt aktor fram si utspørjing av tiltalte. Politioverbetjent Are Uppheim ved Kvinnherad politistasjon forklarte seg om hendingsforløpet slik vitna referer til han.

– Klokka 21.51 var politiet på staden. Me hadde kriminalteknikarar på tråden, og dei avgjorde å ikkje gjera noko meir med åstaden. Tiltalte var roleg, men verka litt fortvila. Eg kunne ikkje seia om han var rusa. Eg var ikkje med han så lenge, og spurde han ikkje ut, berre spurde korleis han hadde det. «Hon bara falt» var det han sa om hendinga, forklarte Uppheim.

Han forklarte også at lokalt brannvesen slo alarm kl. 20.40. Ein av dei fire i Varaldsøy-troppen til Kvinnherad brann og redning er på åstaden nokon minutt før det blir slått alarm, og ein annan har fått telefon eit par minutt før alarm blir slått.

Uppheim var inne i huset, og såg etter om det var fleire personar inne i huset.

– Eg såg ikkje noko teikn til kamp. Det var relativt ryddig i huset. Var ein skade på rekkverket, knekt ei fjøl eller to, elles ikkje noko eg reagerte på. Litt blod på ein vask, som tiltalte har forklart kom frå at han vaska seg etter fått blod på hendene etter å ha sett til Normann.