Politiet: – Eksplosjonsarta brann

Politioverbetjent Torgeir Fosse karakteriserer brannen på Eikelandet i Uskedalen som eksplosjonsarta.

Politiet vart varsla om brannen klokka 10.23. Då var det full overtenning i husværet. Heldigvis hadde bebuarane kome seg ut.

– Det vart tidleg stadfesta at alle var i sikkerheit. Så då var for oss å kontrollera at det faktisk stemde. Det var ein eksplosjonsarta brann, og like etter at vi kom fram registrerte vi fleire småsmell, seier politioverbetjent Torgeir Fosse.

Husværet som brenn er det sørlegaste i ei rekke på åtte.

– Trekken går mot sør, så det er ideelt. Vi har no relativt god kontroll på at brannen ikkje skal spreia seg, seier Fosse.

Alle husværa er evakuerte, og alle bebuarane er gjort greie for.

– Brannvesenet har gjort ein formidabel jobb med å hindra spreiing, roser Fosse.