Politibil låg bak råkøyrar gjennom tunnelen – tok førarkortet

Den uniformerte patruljebilen køyrde bak ungdommen gjennom Halsnøytunnelen like før klokka 20 onsdag kveld. Føraren, som truleg hadde nok med å halda auga på vegen i den høge farten, fekk ikkje med seg kven som køyrde like bak han.

– Patruljebilen fekk målingar med speedometeret, og målinga var så høg at politiet tok beslag i førarkortet til tenåringen på staden, seier Torgeir Fosse ved Kvinnherad politistasjon.

Han ønsker ikkje å fortelja kor fort det gjekk.

– Vi skal no ta kontrollmålingar, og det blir oppretta sak, legg han til.

Føraren, som etter alt å døma må ta beina fatt den neste tida, er ikkje heimehøyrande i kommunen.