Poesikonsert – «Under stjernone»
Skodespelar Hildegun Riise har lagt ut på turné saman med eit knippe musikarar for å framføra dikta til Olav H. Hauge. Torsdag 23. mars kjem dei til Husnes Kulturhus.
Programmet har fått namnet «Under stjernone», og det er Edvard Askeland som har sett musikk til dikta. Med seg har dei Per Jørgensen (trompet), Eivind Aarseth (gitar) og Terje Isungset (slagverk), står det i pressemeldinga.
Vidare står det at Riise og Askeland fyrst presenterte programmet sitt om Olav H. Hauge under Vossa-jazz tilbake i 2005. Året etter vart det ein 3-vekers turné i Sør-Norge, og i 2019 var dei attende på Vossa-jazz og framførte for ei fullsett Vangskyrkje.
Annonse
Olav H. Hauge vert rekna som ein av dei største norske lyrikarane, og dikta hans, som tek ofte utgangspunkt i det nære og i naturen, gjev både utsyn og innsyn, står det i pressemeldinga.
– Hauge er ein av dei diktarane ein aldri vert ferdig med. Det handlar om dei små detaljane og dei store livsgåtene som følgjer ein gjennom livet. Eg oppdagar stadig nye skattar hjå Hauge. «Under stjernone» er ikkje berre ei reise i diktinga hans, men også i eit menneskeliv, seier skodespelaren i pressemeldinga.
– Mange set stor pris på, og har sterke kjensler knytt til det han har skrive, avsluttar Riise, som gler seg til å møte publikum med dette programmet.
