– Plutseleg vart ein liten grøftekant langt meir interessant
I førre veke arrangerte Naturvernforbundet i Kvinnherad ein blome- og fuglesongtur, det var ei interessant og lærerik tur for alle som var med.
Turen fann stad ute på Bjellandsneset med Jan Rabben som forteljar og kunnskapsformidlar med 23 deltakarar som fekk bli med på ei spanande vandring gjennom skogen, fortel dei på sine sider.
– Det er underleg korleis det å læra noko nytt plutseleg gjer ein merksam på kva som finst rundt ein på ein ny måte. Langs skogsvegen la me knapt merke til det dei fleste av oss ser som bregnar, før Jan stogga og synte oss at det berre på eit par kvardratmeter faktisk fantes heile åtte ulike typar bregnar, fortel leiar for Naturvernforbundet i Kvinnherad Mari Teigen Varanes på deira Facebook-side.
Annonse
– Me var gjort merksame på både utsjånad og lukt av dei ulike typane, og plutseleg vart ein liten grøftekant langt meir interessant. Me vart også bevisste lauvsongarar overalt med sine plystrande og dalande strofer, men også gransongaren med sin gjentakande «chiff-chaff»-lyd. Noko som er passande i og med at det engelske namnet er nettopp Chiffchaff.
Varanes takkar også Jan Rabben for fantastisk formidling og ny lærdom, og ikkje minst deltakarane som var med på turen.
– Slike turar håpar me å få til fleire av, avsluttar ho.
