Plass til begge? Det er det delte meiningar om

At nykomaren er populær er det liten tvil om, noko opninga vitna om då det var kø utanfor butikken i god tid før gitteret vart heisa opp. Men spørsmålet er; er det eigentleg plass til to sportsbutikkar på Husnes Storsenter?

«Bånn gass»

Butikksjefen for Sport Outlet Kristina Saghaug ser ikkje på det som noko stort problem.

– Eg synest ikkje at det er problematisk, og me hadde aldri flytta opp hit dersom det hadde vore ei bekymring. Dessutan er me to vidt forskjellige butikkar som fører ulike varer, seier Saghaug då Grenda tok turen innom opningsdagen.

– Korleis har tida fra mot opninga vore?

– Det har vore mykje arbeid. Snikkarane starta i februar, så hadde me ope i butikken der nede fram til onsdag i påsken. Etter det har det vore «bånn gass». Det har blitt nokre arbeidstimar ja, fortel ein smilande butikksjef.

– Då me opna var det veldig mykje folk som stod og venta i begge endar. Etter berre ti minutt var me tom for tilbodet me hadde på Hoka-sko og det tok vel berre kring eit kvarter før me var tom for nokre sekkar me hadde på tilbod også, fortel ho vidare.

Bruk og kast

I etasjen over oppe på Sport1 er stemninga noko annleis, og verken tilset Trond Inge Haugland eller butikksjef Rune Haugland legg skjul på at dei meiner dette er ein dårleg idé.

På spørsmål om det er plass til fleire sportsbutikkar på Husnes er ingen av dei i tvil.

– Det har vist seg tidlegare at det ikkje er plass til to sportsbutikkar på Husnes. I alle fall ikkje med tanke på folk sine handlevanar med å kjøpa ting på nett. Hos oss er det mange som bestiller ting på nett, før dei så kjem hit for å få det montert, sa butikksjefen noko oppgitt.

– Viss me forsvinn så forsvinn også all reparasjon på både sykkel, ski og den slags. Me slit allereie, og det blir ikkje betre av at dei (Sport Outlet, journ.merk.) kom opp også, fortset han openhjartig.

Samtidig syner både Haugland og Haugland stor forståing for at folk ynskjer å kjøpa klede og sko til ein så billig peng som mogeleg. Dei ser derimot berre eitt problem.

– Det er fleire som kjem til oss til dømes etter å ha kjøpt billige fjellsko, men så etter fire turar er skoa øydelagde. Når me då spør om dei reklamerte på dei, så svarar dei «nei, dei var jo så billige», men at dei heilt klart hadde reklamert dersom det same hadde skjedd med våre produkt, poengterer Trond Inge Haugland.

– Det er klart våre jakker til 4500 kroner er dyre her og no, men om ti år er dei jo ikkje det. Folk er veldig opptekne av berekraft berre når det måtte passa dei. Å kjøpa nye sko kvar fjerde tur blir ikkje berre dyrt i lengda, men bidrar også til bruk og kast-samfunnet, legg butikksjef Haugland til.

Motstridande

Butikksjefen ser for augeblinken ganske mørkt på framtida til sportsbutikken på toppen av senteret.

– Me må jo vera positive, men samtidig kan me ikkje lyga heller. Dersom me framleis er her 1. januar neste år, så er eg imponert. Sjølvsagt håpar eg at eg tek feil, konkluderer han tungt.

Senterleiar Terje Børtveit stiller seg derimot klart positiv til endringa.

– I mitt hovudet skal konkurrentar ligga vegg i vegg. Då kjem kundane til same plass. Det er heller ikkje slik at Sport Outlet er ny på Husnes, dei har jo lege borti gata der i fem år minst. No samlokaliserer me dei, og erfaringsmessig skal det vera bra, seier Børtveit.

– Korleis var prosessen med å finna nye leigetakarar då lokalet vart ledig?

– Prosessen var eigentleg forholdsvis grei, det var Sport Outlet som tok kontakt då dei skjønte at det var store lokale på gong. Så gjekk det forholdsvis fort, og me gjorde ikkje noko forsøk på å få ny spiseplass når me fekk ein aktør som tok opp heile plassen. Det var eit enkelt val sånn sett, forklarer den daglege leiaren.

På spørsmål om kva erfaringar senteret gjorde seg etter førre gong det var to sportsbutikkar der, svarer han kort:

– Det var før mi tid, så det kjenner eg ikkje noko til, avslutta han.