Planlegg ny bru i Ænesdalen

Om alt går etter planen kan det koma opp endå ei bru i Ænesdalen i løpet av året, til glede for turfolk og jegerar.

 

Ænesdalen er eit av dei finaste turområda i Kvinnherad. I dag finst det to bruer ein kan nytta for å kryssa elva; Nybro og Kjeholmsbru. Sistnemnde vart sett opp for to år sidan.

– Det er ei flott bru. Elveeigarlaget tok kostnaden, men vi fekk 100.000 i stønad frå Folgefonna nasjonalparkstyre. Prisen kom totalt på 240.000 kroner. Modellen fann vi i eit turblad for Hardangervidda, og det er Hordaland mekaniske på Voss som laga konstruksjonen, fortel Terje M. Enes, leiar i Ænes elveeigarlag.

Den store flaumen i 1940 tok knekken på dei gamle bruene ved Nybro og Kjeholmen. Ved sistnemnde stad kom det seinare opp ein streng ein kunne nytta ved elvekryssinga, men veldig forsvarleg var ikkje den metoden.

– No har vi fått ei skikkeleg trygg bru, seier Terje M. Enes nøgd.

 

Klarsignal

Elveeigarlaget har no planar om å setja opp ei trebru heilt inne ved Vatnastøl. Den vil gjera det mogleg for folk å nytta stiane på begge sider av dalen, og ikkje minst kunna kryssa over på ein risikofri måte.

– Vi vonar å få brua opp i løpet av året. Nasjonalparkstyret har allereie gitt klarsignal, så no ventar vi berre på byggjeløyve frå kommunen. Det reknar eg med er ein formalitet, vurderer Enes.