Permanent bussløysning i Sunndal
Det er stadig stor turisttrafikk i Bondhusdalen. For å unngå busstrafikk heilt opp til parkeringsplassen, ser Kvinnherad kommune på ulike løysningar for at bussane kan snu lenger nede.
Publisert
Tidlegare i august var kommunen, grunneigarar og arkitektar frå 3RW samla for å sjå korleis ein permanent snuplass best kunne utformast ved Olaløo.
«Forslag til løysning er å nytte eigna areal ved Olaløo. I arbeidet med planen utvidar vi derfor plangrensa for detaljreguleringa til å inkludera tilstrekkeleg areal ved Olaløo» heiter det på kommunen si heimeside.
Annonse
No er det plass til rundt ni bussar, men med tanke på tryggleik og manøvrering av bussane bør det leggast opp til at maks tre bussar kjem samtidig, står det i møtereferatet. Det er fleire andre ting som må gjerast for å få til ein bra nok snuplass for bussane.
Utbetring av tilkomstvegen og avkøyrselen til Olaløo, betring av trafikktryggleik og møteplassar langs vegen, fartsdumpar og liknande er ting som må takast opp til vurdering. Det er også behov for venteareal og toalettilbod for alle busspassasjerane, anten på sjølve plassen der bussane stoppar eller i Olaløo.
– Det har no lenge vore bussar der, til og med når mor mi eigde Olaløo, seier Lars Olav Bondhus, grunneigar på plassen. I sommar har han hatt 16-17 bussar på besøk.
– Eg tenkjer at ein må jo vera litt snille med turistane som kjem. Mange av dei er jo pensjonistar eller båtturistar og om alle dei skal gå ifrå hovudvegen blir da jo sjans for trafikkork på vegen opp til parkeringa, seier han.
