Perlo-eple gjekk unna

– Vi hadde ein slik dag i fjor òg, og det vart ein suksess. Sidan har fleire spurt om vi ikkje skulle gjenta det, så no når discovery-epla var modne inviterte vi til open dag med utsal igjen, fortel Askeland blidt, før nokre av dagens mange kundar dukkar opp.

Maria J. Hansen og dottera Serine (9) har teke sykkelen fatt til fruktgarden på Nedre Sæbø.

– No var vi tomme for eple heime, så dette passa perfekt, sa Maria, og bestilte ei rasjonering med eple som mogleg ville halda for ei veke, eller iallfall ei halv.

Eple inngår nemleg som ein tilsynelatande stor del av menyen i familien, særleg for Serine, som gjerne et eple både til frukost, lunsj, mellommåltid og kvelds.

Ni-åringen tek ein saftig bit av eitt av epla i posane som blir langa over disken.

– Så, var det godt?

– Veldig, smiler ho.

1 tonn økologiske godsaker i lausvekt

Til utsalsdagen hadde Ingunn og Lars Arve sett fram om lag 1 tonn med økologiske discovery-epler. Då Grenda troppa opp var fleire hundre kilo av totalen allereie seld.

– Folk har kome og kjøpt heile kassar, så det er veldig kjekt. Dette er jo ikkje lagringseple, men står dei litt kjølig så held dei seg greitt, seier Ingunn.

I tillegg til å selja eple i lausvekt, som dei gjorde denne dagen, nyttar dei epla i jus- og saftproduksjon. Desse produkta er også svært populære, og til konfirmasjonar og på messer ryk flaskene frå Perlo Produkt ut ganske fort.

– Vi pleier å delta på litt messer, og i år skal vi selja produkta våre på julemessene her og på Sunde. I tillegg blir produkta våre seld på Hageland på Stord, forklarar ho vidare.

Forutan eple, lagar dei også saft av hylleblom, og brukar også å ha honning i det sjølvproduserte sortimentet sitt. Grunna midd, eit problem som råka birøktarar frå heile Sunnhordland sist sommar, har dei ikkje honning for sal i år, men vonar det tek seg opp att til neste år.

Alternativ til fruktlager-levering

I tillegg til discovery blir det også produsert aromaeple, sistnemnde framleis ikkje heilt modne. Når det er full produksjon på dei til saman tusen epletrea, kan dei venta 7-8 tonn med raude godsaker.

– Det kan koma mellom 70-100 eple på kvart tre på ein god sesong. Trea våre er ganske unge, og har litt svakare greiner, og då må det tynnast ein del for at greinene ikkje skal knekka. I fjor hadde vi ein fantastisk sesong, medan denne sesongen har vore standard, og heilt ok. Difor har vi heller ikkje trengt å tynna så mykje, forklarer fruktbonden Svein Arve nøgd.

I utgangspunktet var planen deira å levere epla til fruktlager, men slik det er i dag har dei ikkje kapasitet til å køyre heilt til Hardanger Fjordfrukt i Utne, som er det næraste fruktlageret som tek i mot eple frå Kvinnherad.

– Blir det fleire fruktbønder i området her, kan det jo bli meir aktuelt, for då blir det mogleg å samkøyra. Det ville vore fint, for det er trass alt mykje meir arbeid om ein skal lage produkta sjølv, seier Askeland.

Når produkta blir så godt motteke blant lokale kundar, verkar det likevel ikkje som at jobben med å selja noko laust og pressa resten er så alt for verst.