«Perlene» song jula inn
Søndag var det duka for barnekoret «Perlene» sin første konsert. Salen i Halsnøy kulturhus var fylt med stolte foreldre og familie, og på sitt sjarmerande vis skapte barnekoret skikkeleg julestemning.
Publisert
Sist oppdatert
Halsnøy kulturhus oste av julestemning då barnekoret «Perlene» inviterte til julekonsert søndag. Dei frammøtte fekk høyra eit breitt spekter av flotte julesongar, og konserten gjenspegla det me alle kjenner på - gleda og forventninga om at det snart er jul.
Konserten starta med eit dansenummer, etterfølgt av songen «Det lyser i stille grender». Gjennom programmet stod det også fleire uredde solistar i front, mellom anna leverte Elvira Johnsen Sjo, Ingebjørg Nordhus, Amalie Seeberg Fjelland, Jacoba Størksen og Sigrid Hovland flotte tonar med songen «Julenatt». Rørande vart det då koret og Pia Normann sjarmerte med songen «Jul i svingen».
Annonse
Iver og glede
Ungane visste verkeleg korleis ein fekk opp stemninga i salen. Med dansenummeret til låta «Rockin' Around the Christmas Tree» fekk dei publikum til å svinga seg, og julestemninga vart komplett med avslutningsnummeret «Tenner våre lykter».
Ungane imponerte både som solistar og eit samstemt kor, og dei rørande songstemmene og dei flotte dansane traff publikum godt. Det er vel ingenting som set oss i meir julestemning enn små barnestemmer som syng med iver og glede.
