Per har passert Ålborg

Då Grenda snakka med Per Korsvold torsdag, hadde han nett ein liten stopp 7,5 mil sør for Ålborg. Han er framleis eit vakse stykke frå Lyon og Frankrike.

– Eg tenkjer å leggja bak meg 100 kilometer til i løpet av dagen, seier den optimistiske friskusen etter lunsj.

Motvind

Onsdag morgon kryssa han Skagerak med danskebåten. På kvelden kom Per Korsvold til Ålborg, der han overnatta. Torsdag starta med motvind, og slik har det halde seg gjennom dagen.

– Eg har ein plan om å nå fram til Viborg, men eg ser det heile an. Det er fantastisk tilrettelagt for sykkel i dette landet, det er eigne sykkelvegar. Å sykla gjennom Ålborg, til dømes, var ein draum. Det er såpass bra her, at til og med Teslaane har blinklys! seier ein opprømt Korsvold på telefon frå våre gamle unionsfrendar.

– Eg syklar på bondelandsvegar, gjennom tun og har til og med treft på ein fjording langs vegen. Eg får litt med meg innimellom all irritasjonen over vinden, legg han til.

Innsamlinga til inntekt til kreftforeininga er i skrivande stund er på 145.000 kroner, og framdrift og anna kan følgjast tett på facebooksida Ride for a reason – Lyon, som i følgje Korsvold har plass til fleire i Facebook-gruppa.

Rørande avskjed

Oppbakkinga Korsvold fekk då han starta på turen måndag morgon, har gjort inntrykk på 50-åringen.

– Eg set veldig, veldig stor pris på støtta på vegen innover fjorden. I Uskedalen og på Seimsfoss, ved rådhuset, på Ænes, i Sunndal og i Odda. Du blir berre glad over det, og får lyst til å trakka på, seier Korsvold.

– Alt er i rute så langt. Eg er litt stiv i eit kne, men alt anna fungerer. Det er slitsamt i denne vinden, men han skal avta jo lenger sør eg kjem. Som den piloten eg er, så er eg opptatt av vind og vêr, smiler han, og påpeiker at det har blitt 650 høgdemeter i løpet av dei 7,5 milene han hadde til då på torsdagen.