Per er i gang
Han sette ut med flaggborg, følgjebil og finfin kortesje medsyklistar. Turen til Lyon starta måndag morgon, med lukkeønskingar og god støtte undervegs.
Publisert
Sist oppdatert
«Ride for a Reason – Lyon», som Per Korsvold har kalla det tapte veddemålet, ser ut til å bli meiningsfull frå første trøetak. Måndag morgon starta han på dei kring 2500 kilometerane til Lyon i Frankrike. Og turen starta på tunet heime i Uskedalen.
– Sykkelen fekk eg i går. Eg stilte han inn, sykla ned bakken her og opp, og tenkte at han passar. Eg har sykla så lite i det siste at alt blir ei tilvenning uansett, sa han eplekjekt på startstreken.
Annonse
Vegen blir til undervegs
Ordføraren, som skulle vera co-pilot til Rosendal, var uroa over at Korsvold skal finna ut kor han skal overnatta litt etter litt, meir eller mindre frå sykkelsetet.
– Eg kjem til å gjera det slik, ja. Eg vil planleggja neste etappe kvelden før, men eg kjem ikkje til å bestilla meg overnatting før eg ser plassen med eigne auge og tenkjer at her vil eg stoppa, påstod Per.
– Siste overnatting eg har planlagt er i Kristiansand, legg han til, for å visa at denne er litt slik at vegen blir til medan du syklar han.
Annonse
– Kor mykje sykkelreperasjonsutstyr har du med deg?
– Lite. Det er slangelause dekk, men eg har med ein ekstra slange, pumpe og umbraconøklar. Kjedelås og olje, til både her og der. Gunnar Helleland sa eg måtte læra meg kva sårsalve heiter på tysk, for det hadde han måtta læra seg på deira tur, svarte Per.
Elles har han pakka lett. Alt som skal med på turen er festa på sykkelen.
Følgje
– Me har forskjellige etappar. Eg skal til Hovden. Åge skal vera med til postkassen, Erle Marie og Per Håkon skal vera med til Korsneset, opplyste Per like før startskotet gjekk.
Leif Rise ville bli med så lenge beina og batteriet heldt, slik det også var med Terje Sandvik – om enn utan batteri. Gunnar Helleland og Ingeborg Hestad hadde ambisjonar om følgja til Skarsmo.
Annonse
Avskil i Uskedalen var kanskje prega av blanda kjensler. Åge var måteleg nøgd med å senda far i veg, medan andre kanskje var meir spente. Mor Helga Marit Korsvold var meir spesifikk då ho kviskra ei siste formaning til sonen.
– Jada mamma, eg skal hugsa å pussa tennene! repliserte Per.
Støtte
Turen til Kristiansand går med følgjebil, der Styrk Bekkenes og Åsmund Lilleaas tar jobben med å følgja han fram til danskebåten. Følgd i veg vart Per så det heldt. Før han kom til fylkesvegen, måtte han gjennom ei flaggborg av skuleelevar. På Seimsfoss stod tilsette ved Fonnafjord Næringspark og heia han vidare på ferda.
Ved rådhuset i Rosendal skulle ordføraren logga seg av følgjet, men det vart kraftig overskygga av at både Kreftomsorg i Kvinnherad, Malmanger skule og Rosendal Fus barnehage hadde mobilisert talrike heiagjengar.
Første etappe hadde Hovden som mål. Tysdagen skal brukast til å koma seg til Kristiansand. Onsdag startar med ferjetur over Skagerak, før det blir ein halv dag på sykkelsetet.
Annonse
– Dei som seier Danmark er flatt, har aldri sykla der. Det blir 2100 høgdemeter på veg gjennom landet. Det går opp og ned heile tida, kommenterte Korsvold om det som ventar i pannekakelandet.
Derifrå skal det i teorien berre gå oppover, om enn slakt.
PS: Målet om å samla inn 100.000 kroner til Kreftforeningen vart nådd to dagar før han i det heile hadde starta. Då er det berre til å justera opp målsetjinga.
