Peppes Pizza Husnes stenger etter sommaren

– Det er veldig leit at me ikkje har greidd å oppretthalda lønsam drift. I ein lengre periode har me prøvd å få kostnadsnivået ned utan å lukkast. Samtidig har me investert i konseptet med nye uteområde og leikeland, og ser oss dessverre nøydde til å avvikla drifta, skriv Anders Garmel i ei pressemelding i samband med avviklinga.

Garmel er eigedomssjef i Midgard Gruppen, som gjennom Husnes Storsenter er franchisetakarar av Peppes Pizza.

Restauranten opna i 2008, og har 15 tilsette, opplyser eigarane,, som rosar alle dei tilsette for å ha stått på og levert stor innsats for Peppes.

– Det er noko me er veldig takksame for. Me held drifta i gang til over sommaren for å gje dei tilsette tid til å finna seg nye arbeidsgjevarar. Me er også svært takksame for våre gode kundar gjennom alle desse åra, seier Garmel vidare i pressemeldinga.

Kva som skjer med lokala er enno ikkje avgjort. Eigedomssjefen er sitert på at dei veit restauranten har gitt gode synergieffektar til Husnes Storsenter, og sluttar med at han håper lokala vil fyllast med nye, spennande konsept framover.

Det var Kvinnheringen som først omtalte avviklinga fredag ettermiddag.