Peder (10) slo på stortromma

Blant dei 65 blide korpsdeltakarane var Peder Sundal Utne (10) frå Rosendal. Han deltok med dette på sitt første seminar. Før den avsluttande hentekonserten søndagen fekk Grenda nokre få ord med Peder medan han testa ut paukene.

– Me har vore ni stykke på slagverk. Eg speler ikkje på desse under konserten, men på stortromma, forklarte han.

Den unge trommisen har vore aspirant i eitt år, og å delta på sitt første seminar meinte han var veldig gøy.

– Eg har fått nokre nye vener, og me har øvd ganske mykje. På konserten skal me spela tre songar, dei var ikkje så vanskelege å læra. Eg gler meg til neste gong eg skal på seminar, smilte han.

Det svinga

Då dei velvalte orda var formulert, stilna søa i salen: det sikraste teiknet i orkestersamanheng på at konserten snart skal byrja.

Og benkeradene i samfunnshuset var fylt godt opp av familie som gledde seg til å høyra kva underverk seminaret hadde gjort for deira håpefulle.

På programmet sto følgjande stykke: Rumensk folketone, Pål sine Balkan-høner og Burobengen. Og la det ikkje vera tvil, repertoaret fekk det verkeleg til å svinga. Enkelte i publikum klara beint fram ikkje å sitja stille, og tok like godt ein dans i trappa. Veldig kult.

Speleglede og fellesskap

Grunnen til at desse skulekorpsa samlast til fellesseminar i Rosendal kunne Reidunn Seim Steffensen sei nokre ord om.

– Me hadde eit slikt felles oppstartsseminar i 2019 òg, det er kjekt å samlast slik i staden for å sitja på kvar vår tue. Det er ikkje så mange i kvart korps, så dette er ein fin måte å byggja eit fellesskap.

Vidare understreka ho at dei ikkje hadde hatt særskilt fokus på å læra mange nye songar, men retta seg heller mot speleglede og inspirasjon.

Det var sju instruktørar som rettleia dei 65 musikantane gjennom helga, medan Tobias Lamberg Torjusen hadde det musikalske ansvaret for samlinga.