Passerer 1800 fellingsløyve

Forvaltningsutvalet følgde kommunedirektøren si innstilling, og vedtok å tildela 1808 fellingsløyve på hjort og 116 fellingsløyve på rådyr i Kvinnherad for 2024. Tidlegare er det også gjeve løyve til kvotefri jakt på hjortekalv i 2024. Det er òg etter søknad gitt løyve til fri felling av rådyr i valda Husnes, Kaldestadåsen og Bjelland/Våge/Røyrvik i perioden 2023-2027.

Talet på 1808 hjortar er heile 63 fleire enn i fjor.

«Ei sunn hjortestamme er viktig for å unngå sjukdomar og for å få friske og store avlsdyr. Låge vekter og små dyr kan tyda på at stamma har vore større enn beitegrunnlaget tilseier. Både Søre Kvinnherad og Åkrafjorden- og Ytre Hardangerfjord Vest har i sine planar for dei komande åra lagt opp til ein auke i uttaket av hodyr og ein reduksjon av bukkefellinga for å snu veksten i stamma og redusera skadepresset. Kalveandelen skal for alle vald vera minimum 35 %», heitte det i saksutgreiinga.

Mange kollisjonar

Det vert elles trekt fram at kollisjonar mellom bilar og hjortevilt er eit problem. I 2023 vart det registrert 38 påkøyrsler og 19 avlivingar av trafikkskadd vilt. I 2022 var tala 46 påkøyrsler og 22 avlingar, i 2021 dreia det seg om 57 påkøyrsler og 32 avlingar, medan talet for 2020 viste 51 påkøyrsler og 23 avlivingar.

«Det er truleg fleire dyr som vert påkøyrt, men som ikkje vert meldt inn av bilførar», blir det spekulert.