Park langs elva er klar til bruk

Parken består førebels av ein grusveg som strekkjer seg frå bubilparkeringa og nesten heilt opp til Skåla bru. Langs den er det sett ut sju grupper med bord og benker, og alt er universelt utforma. Møblane er leverte av Kvinnherad Vekstbedrift.

Grenda omtalte prosjektet allereie i 2011, då Svein Jarle Mehl saman med Daniel Mehl og Einar Malmanger jobba med å fjerna skog i traseen. På den tida mottok ein 63.000 kroner i tilskot frå fylket til grusing og dei fyrste benkene. Seinare stoppa arbeidet opp, i hovudsak fordi ein mangla pengar. Men for ikkje lenge sidan baud sjansen seg til å koma vidare.

– Kablane til dei elektriske ferjene kom som ein reddande engel, og vi såg då moglegheita til å fullføra. BKK måtte nemleg leggja ned kablar i grunnen her, og vi avtalte då at dei ikkje skulle leggja plen attende, men heller grus til den komande vegen. No er parken i alle fall slik at han kan takast i bruk, smiler Svein Jarle Mehl.

Vil utvida

I dag er 150-200 meter ferdig. Mehl ynskjer no innspel frå innbyggjarane om kva som skal skje vidare og kva området skal fyllast med. Nokre tankar har han sjølv, deriblant å setja ut leiker for dei minste og montera skilt som fortel om lokal kraftutbygging og dei to storflaumane i 1940. I tillegg drøymer han om å forlenga vegen heilt ned til sjøen i eine enden og opp til Storebru i andre, samt å montera tak og leveggar ved borda, slik at staden kan brukast i all slags vêr. Ikkje minst vonar han at den lenge planlagde gangbrua over elva frå stadion til bubilparkeringa snart vert realisert.

– Har du funne eit namn på parken?

– Eg har ikkje døypt han, det har eg ikkje fullmakt til, men har likevel tenkt at Jonatongjen Energipark kan vera eit godt alternativ. For når du sit her og høyrer bruset frå elva, så får du påfyll av energi, smiler Svein Jarle.

Til hausten ser han for seg å rydja i skogen på andre sida av elva, langs fotballbanane. Dermed kan folk også få energi ved å sjå all aktiviteten på stadion. Men skal dette fungera, må traseen jamleg rydjast.

– Kvinnherad kommune eig langs elva, på utsida av vegen, men dei har gitt klar beskjed om at dei ikkje har midlar til vedlikehald. Dermed er ein avhengig av at friviljuge tek ansvar, elles vil det gro raskt igjen, fortel Svein Jarle Mehl.

Fossekallen

Parken er allereie blitt populær, og den morgonen Grenda er på besøk, kjem det eit ungt turistpar og set seg ved eine bordet for å nyta frukosten.

– Ingenting er så idyllisk som å sitja her og eta frukost, slår Svein Jarle Mehl fast, før han legg til:

– Sit du her og følgjer med, så kan du sjå fossekallen som jobbar med å finna seg mat. Og kjem du klokka seks om morgonen, kan sjå hegren hoppa på steinane før han gjer neste dykk.