Paradeklare med Pride Kvinnherad

– Førebels går alt etter planen. Det siste me har gjort er å senda ut oppmoding til lokale idrettslag og bedrifter om å bidra til ta eit standpunkt for eit mangfaldig lokalsamfunn. Me trur det vil bety mykje for ungdom og folk elles at desse blir med og viser si støtte. Dei kan vera med å gjera ein viktig skilnad, og kanskje spesielt for ungdom som ikkje tør å vera seg sjølv, seier Anette Bergstø Jacobsen på vegner av arrangøren Romsleg.

Prideparaden har samling og startpunkt på parkeringsplassen utanfor Rådhuset.

– Me prøver å fordela oss slik at det blir talar og musikk både før og etter paraden. Det blir start ved rådhuset, og så går paraden gjennom Skålagato, ned til kaien der ein snur ved busstoppen og så retur til rådhuset att. Me håper på at eit langt og fargerikt tog, seier Jacobsen.

Markering og feiring

Ho er klar på at det er ei markering, men først og fremst ei feiring.

– Me feirar den framgangen som har vore rundt seksuell legning, med arbeidet avkriminaliseringa i 1972 og Kim Friele sitt arbeid, og alt som har skjedd i positiv forstand til no. Det blir ei feiring av at me kan vera forskjellige, pluss ei markering av at me framleis må jobba aktivt med for å bli kvitt diskriminering og hets. Det er ein veg å gå framleis, seier Jacobsen.

Det er foreininga Romsleg som er primus motor for arrangementet.

– Det viktige er kva som blir arrangert, ikkje kven som arrangerer. Det blir ikkje noko Pride viss det ikkje kjem folk, men det har me inntrykk av at det blir, seier Jacobsen om paraden på laurdag.

Ho vonar naturleg nok at mange blir med på feiringa, og at dei blir synlege i paraden.

– Ungdomsbasen skal vera med og laga effektar, faner og slikt, slik at ein har å visa igjen med, sluttar Jacobsen.

Arrangøren Romsleg skriv dette om seg sjølv på si Facebook-side:

«Romsleg er ei foreining i Kvinnherad som ønsker å fremje eit tolerant samfunn, det det er rom for mangfald og skeiv kjærleik. Me ynskjer at barn og unge skal kjenna seg trygg i eigen kropp og identitet. Eit romsleg samfunn har plass til alle.»