Pandemi pregar årsmeldinga til kyrkja i Kvinnherad

«Vi må vera ærlege på at pandemien har vore krevjande på mange måtar. Til tross for dette har vi fått vore kyrkje for mange menneske og dette året. Sjølv om me har måtta omstilla oss har me hatt mange møte med menneske både personleg og digitalt via skjerm,» innleier Aarthun årsmeldinga.

Gudstenester, vigslar, gravferder konfirmasjonar og konsertar har vorte nedskalerte, utsett, avlyst eller strøyma. Kyrkja har, som andre arrangørar, måtta registrere gjestene sine og lokale smitteutbrot har stansa fleire arrangement på kort varsel. Dette blir peika på som nokre av dei krevjande elementa med året som er gått.

God aktivitet innan bygg og vedlikehald

Samla sett ser kyrkjeverja attende på eit år kor kyrkja i Kvinnherad har klart seg godt, trass utfordringane pandemien har ført med seg.

Blant anna er det utført store utbetringar og naudsynt vedlikehald i fleire av dei tolv kyrkjene i kommunen, med god hjelp i økonomisk støtte og overførte investeringsmidlar. Fleire av tiltaka viser godt igjen.

«Til tross for at vi har mange bygg og mykje gravplass å vedlikehalde har vi dette året klart både jamt vedlikehald og nokre større løft. Det er krevjande å halde ved like slike store bygg. Særleg gjeld dette mellomalder-kyrkjene våre. Dette både med omsyn til økonomi, kunnskap og kapasitet.» heiter det i årsmeldinga.

På lista over tiltak som er gjort utanom den vanlege drifta står renoveringa av sakristiet i Kvinnherad kyrkje, byte av varmekjelder i Eid og Kvinnherad kyrkje, sprinkelanlegg i Ænes kyrkje, nytt kjøken i Valen kyrkje, delvis nytt elektrisk anlegg i Ølve kyrkje, nytt lydanlegg i Husnes kyrkje, samt utvendig kalking og maling i Ænes kyrkje.

Minnelundar

Samstundes er utvidinga av gravplassane ved Eid og Varaldsøy ferdigstilt. Framover vil arbeidet med å etablera minnelundar ved alle gravplassane halda fram.

«Kvinnherad kommune har over 3 år sett av kr 600.000,- kvart år til etablering av minnelundar. Vi har som ambisjon at dette skal halde til minnelund ved alle gravplassane som er knytt til ei av kyrkjene våre. Dette året er ingen nye minnelundar opna. Årsaka til dette handlar om kapasitet. Vi har likevel arbeidd med prosjektering av fleire minnelundar. Minnelund ved Eid gravplass vart godkjent hausten 2021. Her er oppstart sett til februar 2022.» står det å lesa i årsmeldinga.

Ved inngongen til 2022 meiner kyrkjeverja at det er god stand både på kyrkjebygg og gravplassar, sjølv om det enno står att store vedlikehaldsarbeid. Vidare meiner han at ansvaret for slike bygg bør ligge til eit meir sentralt organ enn til kommune eller fellesråd, som i dag.

Kyrkjeverja si samanfatting

I si samanfatting av året peikar Aarthun på at kyrkja sin bodskap er for alle menneske i alle situasjonar gjennom alle tider. Kyrkja i Kvinnherad har hatt den kapasiteten dei har trengt når det gjeld deira samfunnskritiske funksjon i samband med gravferder og gravlegging.

«I fjor skreiv kyrkjeverje i sitt sluttord at 2020 hadde vore eit spesielt år. 2021 har ikkje vore mindre spesielt. Det har vore krevjande å drive kyrkje. Vi vil ikkje, og kan ikkje stengje ned. Samla sett meiner kyrkjeverje at vi kan sjå tilbake på eit år kor kyrkja i Kvinnherad har klart seg godt. Vi er eit sett med medarbeidarar innan ulike fagområde som og er klar for å drive kyrkje i åra som ligg framfor oss.» samanfattar Aarthun årsmeldinga for 2021.