Palfinger satsar på Seim – treng fleire tilsette

I 2020 selde Palfinger Marine anlegget på Seim, og Fonnafjord Næringspark overtok. Men selskapet som er mest kjent for sine livbåtar, la ikkje ned i Kvinnherad. Faktum er at dei for tida er 52 tilsette på Seim og fire i Ølve.

– Folk trur vi er 15 som er igjen. Men målet mitt er at vi skal passera 60 i løpet av oktober, seier HR-sjef Tone Fredheim Mælen.

Selskapet går nemleg no ut og søkjer etter fleire folk, til dømes marinearkitekt, mekanisk ingeniør, serviceingeniør og prosjektmedarbeidar.

– Marine-delen til Palfinger går særdeles godt for tida. No skal det satsast på Seim, på forskjellige sektorar. Det er svært gledeleg for oss som jobbar her. Seinast i går fekk vi godkjent endå ei stilling, fortel salssjef Oddgeir Mælen.

Han meiner selskapet har mykje å tilby.

– Eg trur ikkje folk heilt veit kva moglegheiter som finst her. Her får du moglegheita til å utfalda deg globalt, sjølv om du sit i Kvinnherad. Eine sekundet kan du jobba mot Kina, i det neste mot Salzburg, seier Mælen.

– Dessutan er vi ikkje superspesialiserte. Det er ikkje slik at du sit i to år og sjekkar innvendige diametrar på røyr, men du får vera med på mykje forskjellig, smiler han.

Heile verdikjeda

Arne Handal har tittelen «Head of global engineering Marine», og har kontor i Bergen. Han stadfestar at avdelinga på Seim blir viktig framover.

– Absolutt. Det er difor vi mobiliserer no, for å satsa. Det som er unikt med Palfinger, er at vi har eit ganske godt grep om heile verdikjeda. Alt frå design og produksjon, til sal og service. Unge, talentfulle ingeniørar vil verkeleg få moglegheita til å fordjupa seg hjå oss, kommenterer han.

Heile Palfinger-konsernet har 12.700 tilsette. Palfinger Marine har om lag 1.200. På Seim jobbar ein fyrst og fremst med livbåtar og davitar. Men Palfinger Marine leverer båtar til både oppdrett, offshore, havvind, forsvarsindustrien, cruise og handelsflåten. Sjølve produksjonen føregår i Vietnam og Kina.

– Eg vågar påstanden om at det ikkje finst nokon stad i verda med meir kompetanse på livbåtar enn på Seim, melder Oddgeir Mælen.

Elektrifisering

Det er ikkje berre lokale personar som kan søkja på dei nye stillingane. Palfinger Marine tek også i mot folk som vil flytta til kommunen vår, enten frå andre stader i Norge eller utlandet.

– Med den teknologiske utviklinga har Verda blitt mindre. Difor kan ein bu i Kvinnherad og ha spennande og utfordrande jobbar, samstundes som ein har trygge og rolege rammer rundt seg, lokkar Oddgeir Mælen.

Tone Fredheim Mælen trekkjer elles fram at 45% av dei tilsette på Seim er damer, og i den lokale leiargruppa er det 50% kvinner.

Palfinger Marine skal no auka merksemda på elektrifisering og digitalisering. Kontoret på Seim er sentral i denne satsinga.