Palfinger med stor kontrakt og lokal underleverandør

– Denne daviten er så stor at me i grunn aldri har laga dei sjølv, men stort sett det ut til utanlandske verft. No klarer ECG (tidlegare Hellesøy Verft, journ.mrk) å vera konkurransedyktige på kvalitet, tid og pris, fortel seier salssjef Oddgeir Mælen, som i det internasjonale konsernet Palfinger Marine er utstyrt med tittelen Global Sales Manager

Tyfon-råka

Kontrakten Palfinger Marine har inngått med eit Kinesisk verft er på levering av eit større davitsystem.

– Dette er ein god kontrakt for Palfinger Marine på Seimsfoss. I 2023 hadde me ein svært god ordreinngang, og det nye året har starta godt, legg Mælen nøgd til.

Kontrakten er på levering av ein stor davit-konstruksjon, som er spesiallaga for å halda fire av Palfinger sine FF1200 fritt fall-livbåtar.

– Det er 110-115 tonn med stål. Det er litt spesielt med denne, for det er ein rigg som har lege i opplag på eit verft, og så vart råka av ein tyfon. Daviten toler ein tyfon, men det han ikkje toler, er at naboplattforma slitnar og renn rett i han. Det blei for mykje, og er ikkje noko me får tatt høgd for. Sjølve riggen har åtte FF1200, men det er fire som skal hengja i denne daviten, utdjupar Mælen til Grenda.

Han ser ikkje bort frå at det kjem fleire ordrar på dette prosjektet.

Lokalt fotavtrykk

– Det som er ekstra kjekt med denne ordren er fotavtrykket i Kvinnherad, seier Mælen vidare. På grunn av storleiken produserer ikkje Palfinger denne typen davitar på sine eigne fabrikkar. Tidlegare har produksjonen av desse davitane vore lagt til Aust-Europa. Då er det svært gledeleg at me denne gongen har funne ein lokal leverandør, påpeikar Mælen.

ECG AS vann fram i konkurransen om å produsera daviten

– ECG viste seg konkurransedyktige på pris, men ikkje minst tilfredsstilte dei dei høge krava til kvalitet og tryggleik som Palfinger stiller. Me ser fram til å arbeida saman med ECG AS for denne leveringa, og med sal, ingeniørarbeid og prosjektleiing på Seimsfoss, vert dette ei sann Kvinnherad-levering, smiler salssjefen.

Gjennombrot for ECG

Dagleg leiar i ECG Robin Holmedal Pedersen seier i ei pressemelding i samband med kontrakten at dei er stolte, og føler det er ei stor ære og ei tillitserklæring at Palfinger tildeler dette oppdraget til ECG.

– ECG vil rosa Palfinger for å gå lokalt med ein slik ordre. Dette betyr enormt mykje for den lokale industrien i Kvinnherad. Det å liggja så nært kvarandre vil óg gjera samspelet i denne ordren enklare med fysiske møte og gjennomgangar. Me ser no veldig fram til å ta fatt på arbeidet, og kunna jobba tett med ein stor aktør som Palfinger, seier Pedersen i pressemeldinga.

Han understrekar at kontrakten også sikrar ECG langsiktig horisont og godt trykk i heile 2024, saman med deira andre oppdrag.

Høg aktivitet

Den store ordreinngangen i 2023 gir veldig høg aktivitet på kontora på Seimsfoss. Etter nokre år med omorganiseringar og reduksjonar i staben, har det no endra seg.

– Me har ute lysingar etter fire stillingar her på Seimsfoss. Det er år og dag sidan me gjorde, seier ein nøgd Oddgeir Mælen.

– Me er ei internasjonal bedrift, så titlane på jobbane kanskje er svulstige, men me har ein spennande arbeidskvardag. Det kan illustrerast med at det er kjapt og greitt for prosjektingeniørane å reisa inn til Årsnes for å gjera oppfølging, samtidig som du har prosjektoppfølging mot Kina. Der har du spennet me har her hos oss. Slik er det i dei fleste posisjonar, meiner han, og illustrerer:

– Min sjef sit i Bergen, ein annan i Tyskland. Dagleg leiar sit i USA.

Palfinger-konsernet hadde i 2022 12.000 tilsette og over 2,2 milliardar euro i omsetning. Marine-delen som den gamle Harding-bedrifta høyrer til, utgjer 15 prosent av denne omsetninga.

– Det er ein del som no går godt, og går stadig betre. Det er god stemning på huset. Det har det for så vidt alltid vore, men er litt annleis no om dagen, sluttar han.