Pålegg om opprydding av eternit-avfall
Kvinnherad kommune har nyleg sendt ut varsel om opprydding av forureina grunn på ein eigedom, der eternitplater er funne spreidd over store delar av ei tomt.
Publisert
Sist oppdatert
Kommunen har gjort eit søk i arkivet, og funne ut at dette funnet heng i hop med eit eternit-tak som vart rive på same eigedom i 2012.
«Ut frå funn av eternit som er funne på eigedomen no i ettertid tyder det på at avfallshandteringa ikkje er gjort slik det vart meldt inn i 2012. Dette får konsekvensar for den som er forureinar i form av at det vert sendt ut eit varsel om pålegg om opprydding», heiter det i eit brev til forureinar, datert til 7. oktober.
Annonse
Som sagt, men ikkje så gjort
Allereie attende i 2012 fekk kommunen ei bekymringsmelding om avfallsandteringa. Kommunen vart då forklart at eternit-taket vart bytt ut grunna akutt lekkasje og at avfallet var levert til lokal avfallsstasjon.
Dette ser ikkje ut til å stemma, noko kommunen vart obs på i samband med eit gravearbeid på staden våren 2022. Etter ei kartlegging på eigedommen har kommunen no sendt ut eit pålegg om opprydding.
Dersom det ikkje vert rydda opp innan 8 veker vil vedkomande kunne venta seg eit vedtak der plan for fjerning blir kravd.
