Pålagt å delta i overvakingsprogram
Ein drøss lokale verksemder har fått pålegg om å delta i eit felles overvakingsprogram for Hardangerfjorden.
Publisert
Sist oppdatert
I førre veke sendte Statsforvaltaren i Vestland ut brev til mange lokale bedrifter. Temaet var pålegg om deltaking i felles overvakingsprogram i Hardangerfjorden. Her lokalt har brevet gått til Sunnhordland fjordbruk AS, Tysnes fjordbruk AS, Sjøtroll havbruk, Lingalaks AS, Eide fjordbruk AS, Mowi ASA, Fjelberg fjordbruk, Elite Construction Group AS, Halsnøy dokk AS, Viking Fjord AS, Ænes inkubator AS og HMR Husnes AS.
Pålegget skal omfatta alle verksemder med løyve frå Statsforvaltaren, og forskriftsregulerte verksemder med utslepp av ein viss storleik. Det følgjer også med nokre økonomiske utlegg. I brevet til Ænes inkubator er det rekna ut at dei skal bidra med 12.852 kroner i 2024, 11.920 kroner i 2025 og 10.449 kroner i 2026 (alle beløp eks. mva).
Annonse
Botndyr
Overvakingsprogrammet skal vara i tre år.
«Vi ser behov for felles overvakingsprogram i fleire av Vestland sine fjordar for å kartlegge dagens forureiningsnivå og miljøtilstand. Dette er spesielt aktuelt i område der det er fleire og gjerne ulike typar kjelder for utslepp, både av næringsstoff og miljøgifter. Ei overvaking av samla belasting i slike område er særs nyttig med tanke på kunnskaps- og avgjerdsgrunnlag», skriv Statsforvaltaren.
Konsulent skal skriva rapport for kvart av dei tre åra med overvaking. Den fyrste skal leverast i februar 2025, og vil innehalda resultat av sedimentprøvetaking (botndyr og miljøgifter) og det fyrste året av vassprøvetakinga.
