Påkøyrt på fjorden: – Hoppa i sjøen i siste sekund

I 17-tida tysdag ettermiddag vart ein fritidsbåt påkøyrt av eit lasteskip utanfor Røynholm mellom Løfallstrand og Rosendal. Om bord i fyrstnemnde var Geir Olav Guddal (57) og sonen Sigbjørn (17).

– Det var ganske dramatisk, vil eg seia, kommenterer Geir Olav når Grenda snakkar med han onsdag morgon.

Båten han og sonen sat i har han bygd sjølv, med god fagleg hjelp av ein kollega frå gamle Harding. Det er ein 17 fot skjergardsjeep, som stod ferdig kring 2001. Motoren er derimot relativt ny.

– Vi har båten liggjande i Røynholm, og skulle berre ta den ut ein tur og testa at alt fungerte. Men plutseleg stoppa motoren rett utanfor Røynholm. Mest truleg har det kome luft inn i motoren, fortel Geir Olav.

Redningsaksjon: Hamna i sjøen etter kollisjon mellom to båtar

Han identifiserte problemet og byrja å jobba for å fiksa det. Mellom anna måtte han kappa i bensinslangen.

– Så seier gutungen: «Det kjem ein stor båt mot oss», fortel Geir Olav.

– «Du får reisa deg opp og veifta så han ser oss», svarte eg.

På instinkt

Framleis går det ei stund før ulukka inntreff. Geir Olav meiner det gjekk 10-15 minutt frå motoren stoppa til kollisjonen.

– Eg bala vidare med slangen, og fekk den på plass att. Då eg skulle til å pumpa i bensin igjen, skjøna eg at det ikkje var tid til meir. Då reiste eg meg opp og byrja å veifta med armane eg også. Vi tenkte heile tida på å hoppa, men følte det var skummelt i tilfelle båten ville oppdaga oss og prøva å svinga unna i den retning vi sumde, seier han.

Difor venta dei i det lengste, men til slutt var det ikkje andre alternativ enn å koma seg vekk snarast råd.

– Til slutt måtte vi hoppa berre sekundar før båten trefte oss og sumde alt vi greidde. Heldigvis valde vi å hoppa til rett side. Båten trefte omtrent midtskips, fortel Geir Olav.

Sigbjørn opplevde det slik:

– Etter at Papen snakka om å hoppa, tenkte eg ikkje lenger. Då gjekk alt på instinkt, heilt til eg stod oppå båten igjen. Kollisjonen må ha skjedd medan eg var under vatn, analyserer han.

Stoppa helikopteret

Lasteskipet trefte midt på langsida av fritidsbåten. Sistnemnde kantra og vart liggjande med kjølen i vêret, medan lasteskipet berre fortsette ferda. Geir Olav og Sigbjørn greidde å klatra oppå kjølen og veifta etter hjelp. Hjelpa var heldigvis ikkje langt vekke. Fyrst ut var dei tyske turistane Jason-Lee Neumann (16) og Martin Bár (44) (ref. Bergens Tidende), som rykte ut frå Rosendal hyttetun & camping, og den lokale Knut Riise. Det var Riise som tok fyrst tok begge havaristane om bord.

Riise fortel til Grenda at Geir Olav Guddal hadde ein traktor ståande i Røynholm, og den ville vera nyttig til å heisa båten på land. Det vart difor bestemt at tyskarane skulla frakta Sigbjørn til hamna, slik at han kunne køyra traktoren i posisjon, medan Riise festa tau på båten og byrja slepinga. På tørt land igjen fekk Sigbjørn snakka med politiet.

– Eg fekk forklart at vi var to personar og at begge hadde kome seg opp. Det roa situasjonen, og naudetatane kunne stoppa utrykkinga, fortel han. Dermed kunne helikoptera som var på veg snu. Det same gjorde ferja MF «Lærdal», som hadde gått ut av ruta si for å setja kursen mot ulukkesstaden.

Lasteskipet som køyrde på fritidsbåten heiter «Basen», og kom frå sandtaket i Sandvikjo på veg mot Norheimsund. Etter ulukka har Geir Olav Guddal snakka med kapteinen.

– Han hadde ikkje sett oss. Eg synest det er litt spesielt for vi låg i ro i sikkert 10-15 minuttar, og gjorde oss til kjenne, filosoferer han. «Basen» snudde fyrst etter at dei høyrde om ulukka på Skipsradioen. I tillegg ringte Knut Riise til dei.

Full av adrenalin

Fritidsbåten ligg no på land i Dimmelsvik. Skadane er tilsynelatande overraskande små, noko som truleg skuldast måten den er bygd på.

– Det er ein «mann over bord»-båt, som er forsterka på sida der kollisjonen skjedde. Det ligg mange timar arbeid bak denne båten, sånn sett er han uerstatteleg, seier Geir Olav Guddal.

– Korleis har de hatt det etter ulukka?

– Eg må innrømma at det ikkje vart mykje søvn i natt. Akkurat der og då var det mykje adrenalin, men i natt vart det mange tankar i hovudet, seier Geir Olav Guddal, som til vanleg pendlar mellom Ullensvang og Guddal.

– Det har eigentleg gått fint med meg, sjølv om eg var stappfull av adrenalin ei god stund, smiler Sigbjørn.

Duoen nyttar høvet til å takka alle som hjelpte til tysdag kveld.

– Utruleg flott oppfølging av alle, både politi, brannvesen og dei som henta båten. Også stor takk til dei som kom ut til oss, seier Geir Olav Guddal.