– Paintball er ein kjekk lagsport med litt fart og adrenalin
Paul-André Sjo har sett i gang det han håpar kan bidra til eit nytt paintball-miljø på Halsnøy. Trebarnsfaren har investert i utstyr, og har eit område i skogen som han bruker til å spela.
– Er det nokon som har med susp?
– Toler du ikkje å bli treft?
Annonse
Det blir mykje erting og latter når ein gjeng unge karar møtest hjå Paul-André Sjo på tysdag ettermiddag for å spela paintball. Det er første gongen dei speler i skogen ved huset hans i Verdens Ende.
Utvidar aktiviteten
– Eg har hatt litt utstyr lenge, berre til bruk for meg sjølv og gutungen og hans kompisar, fortel Sjo.
Men etter eit arrangement i Sveio der han spelte paintball med kollegane ved Halsnøy Trelast, fekk han idéen om å utvida aktiviteten. Meir utstyr vart innkjøpt nyleg, og han kunne starta med utleige og arrangement.
Annonse
– Det er heilt i startfasen. Eg hadde eit utdrikkingslag her for ein månads tid sidan. Då gjekk eg på finn og kjøpte det siste eg trong av utstyr til å halda arrangement.
Paul-André Sjo viser fram markørar, masker, kuler og dykkarflasker med luft, og forklarar kva hans synest er kjekt med paintball.
– Paintball er ein kjekk lagsport med litt fart og adrenalin. Det kan passa alle. Og så kan ein bli einige om strategiar. Ein kan ikkje berre drusa på og tru at ein ikkje blir tatt, ein må vera taktisk. Det mange måtar ein kan spela på, med ulike reglar og utfordringar.
Må passa på sauene
Men spelet er ikkje utan sikkerheitsreglar, og Paul-Andre tek rolla som dommar og sikkerheitsvakt under spelet. Noko av det han må passa på, er at sauene hans ikkje forvillar seg inn i paintball-sonen.
– Ja, det skjer ikkje så ofte, men viss sauene kjem seg inn på området, så stoppar me spelet ei lita stund og jagar dei vekk før me held fram, smiler han.
Annonse
34-åringen er nøyen med å gå gjennom sikkerheitsrutiner for gjengen som samlar seg i skogen hans for å spela. Deltakarane kjøper posar med dei fargetilsette kulene, og bestemmer seg for kva spelereglar som gjeld før dei set i gang.
– Og ikkje juks!, seier Trym Fjelland
– Kvifor ser du på meg?! Martin Engelsen føler seg truffen.
Paul-André Sjo håpar at folk vil spela paintball hjå han om dei har ei bursdagsfeiring eller andre høve. Han har også eit håp om at paintball-miljøet i kommunen kan ta seg litt opp, når ein no har høve til å spela i skogen ved Verdens Ende.
– Ja, det hadde jo vore kjekt om nokon vil treffast for å spela ein gong i månaden for eksempel, seier han.
