På jakt etter ny einingsleiar
Dette skuleåret har Undarheim skule den konstituerte rektoren Marion Haga ved roret, måndag denne veka byrja derimot kommunen arbeidet med å finna ny einingsleiar.
– Grunnen til at me valte å gå for ein konstiuert rektor dette året var fordi avgjerda i fjor vart sein, og for å sleppa å få det eg kallar for «stolleik», så valte me heller å gå for konstituert, sa sektorleiar Heidi Særsten Solheim.
Viktig del
Annonse
– No er me tidleg ute med forhåpentlegvis å få på plass ein ny rektor, slik at me har litt meir ro kring hovudrunden som me har kvart år på jakt etter andre stillingar. For kanskje er det søkjarar som er allereie tilsette, og då får me eit hol ved ein annan skule som må fyllast og på den måten så blir prosessen drege ut, forklarte Solheim vidare.
Solheim understreka også at det kom til å bli ei svært spanande stilling med tanke på den nye skulen som kjem i 2026.
– Eg trur det blir bra med nye skule, og det blir sjølvsagt ein viktig del av jobben som denne rektoren går inn i med overgangen til nytt skulebygg, understreka sektorleiaren.
– No vart jo utlysinga lagt ut i dag (måndag, journ. merk.), så førebels er det ikkje kome inn nokre søknadar, men me håpar heilt klart at me har ein del søkjarar innan fristen går ut, avslutta ho.
