På jakt etter dagleg leiar til Kvinnherad si nye storstove

Hallen skal stå klar i januar 2023, og Kvinnherad kommune søkjer no ein dagleg leiar som kan tiltre stillinga rundt 1. august 2022.

«Vi søkjer etter ein dagleg leiar til å utvikle og drifte Kvinnherad Arena slik at arenaen får spela ei rolle i barn, unge og vaksne sitt kvardagsliv. Vi ynskjer og at næringslivet skal dra god nytte av arenaen sine fasilitetar. Utviklinga av arenaen skal skje i godt samspel med øvrige aktørar innan kultur og idrett i kommunen.» heiter det i utlysinga.

Vidare vert Kvinnherad Arena fremja som kommunen si nye kulturelle storstove, ein stor idrettsarena både for bredde og toppidrett, samt ein viktig arena for opplæring.

I tillegg til dette skal Kvinnherad Arena vera ei viktig brikke i barns oppvekstvilkår, og ein oase for fysisk utfalding. Den skal også vera viktig i sikringa av god folkehelse i kommunen.

Den som vert tilsett som dagleg leiar vil få ansvar for «å sikre god aktivitet, sikre at folk trivs og at alle samarbeidspartnarar kjenner seg heime der, og å bidra inn til god, effektiv, innovativ og rasjonell drift av arenaen.»