På høg tid med ei oppgradering
Sikkerheitsposten på Valen Sjukehus har lenge vore klar for ei utbetring. Onsdag denne veka skal styret i Helse Fonna handsama ei innstilling frå administrasjonen om å senda ein lånesøknad for å framskunda planane.
I sakspapira frå helseføretaket vert det skildra problematiske tilhøve med tanke på både areal, sikkerheitstiltak, bygningsmasse og uteområde.
«Dette medfører bygningsmessige løysingar som ikkje understøttar god pasientbehandling og sikkerheit for pasientar og medarbeidarar. Dagens bygningsmessige løysingar ivaretar heller ikkje lovkrav for institusjonar godkjent for tvungent psykisk helsevern.», kan ein lesa i utgreiinga frå Helse Fonna.
Annonse
Fleire plassar
I utgangspunktet var investeringsmidlar planlagt for 2028. No ynskjer Helse Fonna å gjennomføra ein anbodsrunde i 2025, og få oppgradert sikkerheitsposten i 2026, sidan behovet er så stort. I samband med dette skal styret no avgjera om dei skal søka Helse Vest RHF om eit internt lån på 100 millionar kroner.
All bygningsmasse ved sjukehuset har blitt vurdert med tanke på å kunna erstatta sikkerheitsposten. Det har blitt konkludert med at sengepostavdelinga Kringlebakken eignar seg til å husa ein sikkerheitspost. Her vil ein få tilfredsstilt krav om uteområde, og ein kan utvida tilbodet med 3-5 plassar.
To løysingar
Annonse
Eit forprosjekt frå Helse Fonna er no godt i gang. I forprosjektet vert to løysingar greia ut: Den eine vil dekka Helse Fonna sitt behov på 10 sikkerheitsplassar og to skjermingseiningar, og den andre tar sikte på å dekka behovet til også andre helseføretak i Vest, med 14 sikkerheitsplassar og to skjermingseiningar.
Det var avisa Sunnhordland som først omtala saka.
