– På høg tid at verka blir samla
Denne veka har Øyvind Hjelmen fotografert verk av Lul Krag i Dinosaurhuset i Steinparken. Folk frå heile kommunen har vore innom med sine bilete av kunstnaren.
Publisert
Sist oppdatert
– Det har vore ei veldig respons, vi hadde aldri rekna med dette. Det har vore fullt køyr heile veka, fortel Knut Sellevold og Lars Børge Sæberg, som er initiativtakarane til Lul Krag-prosjektet.
Dei kan fortelja at det har vore ein storm av folk som har kome innom for å levera bilete til fotografering, og at det har gått over all forventning.
Annonse
– Vi er imponerte over folk som bidreg. Dette er ein dugnad, og det har verkeleg vore eit breitt engasjement i heile kommunen. Det er folk langt oppi 80-åra som har køyrd for å henta og levera bilete, seier Øystein Skaala i Rosendalsstiftinga, som tek seg av søknadar, økonomi og organiseringa av filmproduksjon.
I løpet av dagen torsdag vil dei ha bikka 150 fotograferte verker av Lul Krag. Dei har fått inn eit par oljemåleri, noko teikna med pastell og ein heil del kolteikningar. Dei skal også ut for å fotografera verk heime hos folk som ikkje har moglegheit til å koma og levera.
Får gjort det skikkeleg
Grenda har tidlegare skrevet om Lul Krag-prosjektet, og eldsjelene som vil bringa Lul Krag fram i lyset igjen. Grunnen til at dei fotograferer bileta er for å samla dei i ein digital utstilling som skal visast fram i bygda.
Annonse
Med seg på laget har dei fotograf og biletkunstnar Øyvind Hjelmen, som tek bileta av det som er den største Lul Krag samlinga som er gjort nokon gong.
– Øyvind tok invitasjonen vår på strak arm, det er vi veldig glad for. No får vi gjort det skikkeleg, seier Skaala.
– Det har vore ein utruleg kjekk jobb å få vera med på. Eg er nok over gjennomsnittet kunstinteressert, men Lul Krag har eg berre høyrd om som eit fjernt ekko i ein eller anna samanheng tidlegare, så eg kjente ikkje til arbeidet hennar, seier Hjelmen, og legg til;
– Det har vore veldig fint å sjå bileta hennar på nær hold, ein del av dei er utruleg flotte. Og det har vore kjempegøy og ikkje minst lærerikt å høyra historia som folk har om bileta.
«Den lyse enkelthets maler»
Fleire veit nok ikkje kven Lul Krag var, og det er det denne gjengen vil endra på.
Annonse
– Jo lengre tida går og jo fleire generasjonar som kjem, jo mindre veit ein kven Lul Krag var. Ho var jo eigentleg ei av dei komande stjernene på kunsthimmelen i hovudstaden. Men så trakk ho seg tilbake frå kunstmiljøet og slo seg ned i Rosendal, fortel Skaala.
I ein artikkel vart Krag kalla «den lyse enkelthets maler», då ho var glad i å stilisera verka sine til eit visst punkt.
– Krag var forankra i det naturalistiske, men ho skrella vekk alle detaljar og fokuserte på kjernen i motivet. Alt det andre var ikkje så viktig. For å kunna teikna landskapet måtte ho bli eitt med fuglande, eitt med trea, eitt med blad og blomar. Ho måtte sjå at ho var ein del av dette store mysteriet, skaparverket som er naturen, fortel Knut Sellevold.
– Knut har nok stoff om Lul Krag til å skriva ei bok. Dette er nok den mest omfattande dokumentasjonen av Lul Krag som er gjort til no, og kanskje ligg det spennande oppgåver for nye kunststudentar her? Så blir det sjølvsagt eit spørsmål korleis vi skal lagra desse skattkistene, det digitale materialet og det fysiske materialet, seier Skaala.
Verdt meir enn ein trur
Skaala vart tipsa om eit bilete av Lul Krag som låg ute på nettauksjon på Blomqvist, og gjekk inn for å sjå på det. Prisestimatet var pluss minus 5000 kroner.
Annonse
– Det var eit nydeleg fint bilete av Lofthus sin natur i kinesisk stil, med litt fargar. Eg tenkte at det skulle vi så inderleg hatt, så eg la inn bod, fortel han.
Diverre var det andre interesserte òg, og det vart gitt bod etter bod.
– Eg sat klar med bodet mitt, og eit sekund før fristen trykka eg på send-knappen. Det gjorde visst han andre også, så fristen vart forlenga, og den andre interesserte vann, fortel Skaala.
– Biletet kom opp i ca. 20.000 kroner, så i løpet av eit døgn har prisen på kunsten til Lul Krag altså tredobla, ler han.
Sjølv om Skaala ikkje vann bodkrigen, har han i det minste fått sjå mange fine Lul Krag-bilete denne veka, og prosjektet for å få ho til å bli meir synleg ikkje berre nasjonalt men lokalt, er i full sving.
– Eg vil senda ein hjarteleg takk til alle som har vore med og bidrege. Ein del av kunstverka til Lul er gjennom arv flytta ut av Rosendal, så det er på høg tid at denne dugnaden vert gjennomført, seier Sellevold.
