– På høg tid at e-sport vert prioritert
Eit av laga som fekk ei ekstra stor ause frå pengesekken til Sparebank1-stiftinga Kvinnherad tysdag kveld, var IL Trio – e-sportgruppa. Som namnet tilseier, har dei planar om å få i gang ei e-sportgruppe og, i fylgje dei sjølve, vonlegvis eit meir organisert e-sportmiljø i Kvinnherad.
Leiar i styret, Kai Morten Torget er både overraska og nøgd over pengegåva dei fekk.
– Eg hadde på ein måte ikkje venta at me skulle få så mykje, sjølv om det var så mykje me søkte om. Så det er klart at støtta er svært gledeleg. Dette får oss godt i gang, seier Torget like etter utdelinga.
Annonse
Torget opplever at dette er noko det er stor interesse for, og er klar på det er på høg tid at e-sport vert prioritert.
– Det er mange som interesserer seg for dette, men likevel finst det ikkje noko organisert miljø. Me ynskjer å skapa eit nettverk og fanga opp dei som hittil kanskje har dotte litt utanfor og få dei inn i litt meir kontrollerte former, fortel Torget engasjert.
Rekruterer
– Me har jo sett at dette har blitt gjort fleire andre stader, og med veldig gode resultat. Me er som sagt veldig nøgde med å kunne koma oss i gong no, men dette burde vore gjort for 15 år sidan, understrekar han.
Annonse
Vidare fortel han at dei allereie har lokalet klart, og at dei også har fått med seg KVV på laget.
– Skulen har uttrykt ynskje om å oppretta ei e-sportlinje, og tilbaud oss då eit lokale me kunne bruka som ligg bak fagbygget deira. Dei har også tilbode at elevane ved byggfag kan laga benkane til oss, fortel ein svært nøgd Kai Morten Torget.
Det er tydeleg at dette er noko Torget brenn for, då han engasjert fortel vidare om at dei treng å rekruttera både spelarar og trenarar. I tillegg ser han også for seg at dei med tid og stunder kan reisa rundt og delta på konkurransar.
– Det krev sitt å bli ein god e-sportutøvar. Det ligg mykje trening bak som gjev mange fordelar. Du får til dømes eit godt sidesyn, god sans for detaljar, og du blir svært god på å analysera. Dette er ferdigheiter som også er svært ettertrakta i arbeidslivet, avsluttar leiaren.
