På banen for kreftramma

– Me kallar oss Sagogryna, og har gjennom heile året utetrening oppe ved Vangssago, anten det er sol, snø eller regn. Dei fleste av oss er frå pensjonistalder og oppover, og fleire har vore kreftramma. Me har da gyseleg løye i lag, fortel ein av pådrivarane for gruppa, Astri Måkestad.

– Me tykkjer me skal syna oss litt fram for andre, og alder er ingen hindring. Me prøver å ha fokus på noko alvorleg, men skjemt og alvor går hand i hand. Litt galgenhumor må ein ha, ler ho.

Symbolsk

Den livlege gjengen har i desse dagar fleire ballar i lufta.

– Me har bestemt oss for å stilla med lag i Kreftforeningen sin årlege Stafett for livet. Det er eit arrangement som føregår over heile landet, og vårt næraste er i Odda, forklarer Måkestad.

– Det eg veit er at det skal føregå i eit heilt døger oppe på idrettsbana, der det alltid må vera minst éin frå laget på banen til ei kvar tid. Det heile er eit symbol på at det alltid må vera nokon på banen for dei kreftramma. Det blir også masse underhalding undervegs, fortset ho.

Stafett for livet går av stabelen 26.-27. august, men før den tid er Sagogrynsgjengen i full gang med å stella i stand eit lotteri til inntekt for Kreftforeningen.

– Me er litt grøne på dette her, men me har lyst til å vera med, og me bestemte oss for å ha eit lokalt lotteri fram mot stafetten. Vinnarane kjem til å bli trekte under det arrangementet, seier Måkestad.

God støtte

– Det er viktig for oss å setja fokus på dette for det er mange som blir ramma av kreft, og det er mange som kjenner nokon som har blitt ramma. Me har fått god støtte frå både næringslivet og private personar til gevinstar, og me håpar at flest mogeleg kjøper lodd. Alle inntekter går fullt og heilt til Kreftforeningen, understrekar ho.

Måkestad oppmodar også fleire til å melde seg på stafetten.

– Me er 16 personar som har meldt oss på så langt, men det er enno ikkje for seint, avsluttar ho.