Øystein Kloster har laga spelefilm i Berlin
Det byrja som eit konseptalbum, og enda til slutt opp som ein fiktiv dokumentar. Dette er mogleg måten å gjera det på, for «The Makeover of Ashton Croyd» gjer det allereie skarpt på internasjonale filmfestivalar.
Publisert
Sist oppdatert
Regidebuten til den utflytta Kaldestadbuen har så langt hausta 14 prisar, mellom anna fire for beste spelefilm, og fire til Kloster som beste skodespelar.
Ein av festivalane som har premiert filmen, 1st Monthly Film Festival i Beograd, meiner den har sterke kvalitetar både i formidling og narrativ. «Filmskaparen har gjort ein strålande jobb med å skape ei minneverdig filmatisk oppleving,» er attendemeldinga.
Annonse
– Det starta som eit konseptalbum, men haldt fram å utvikle seg etter kvart som eg møtte fantastiske talent undervegs. Eg har aldri gitt opp eit prosjekt så mange gonger som eg har gitt opp dette, men det har overlevd all tvilen, skriv Kloster frå Berlin.
Arbeidet har teke fleire år, og blitt realisert på trass av ein verdsomspennande pandemi. Kloster medgir at arbeidet har vore altoppslukande til tider. No når filmen endeleg er ferdig håpar han å få til ein lokal premiere i kinosalen på Husnes, truleg i mars.
Pseudo-dokumentar
Filmen er eit drama, som tek form som ein fiktiv dokumentar. Handlinga er lagt til Berlin, kor Kloster har hatt si heimeadresse dei siste åra. Den utflytta Kaldestadbuen speler sjølv hovudrolla som Ashton Croyd.
Annonse
Ashton Croyd er ein heimlaus gatemusikant som får ein ny sjanse i livet når han møter fotografen Lisa Jonrel, spelt av tyske Anita Kluge. Jonrel har ei komande utstilling på planen, og er på jakt etter eit fotoprosjekt som ho skal presentere der. Gjennom møtet med den heimlause vert ideen skapt; Ho skal dokumentere at gatemusikaren vert omgjort til ei bona fide stjerne på 6 månader.
Det går ikkje heilt etter planen.
Fotografia til utstillinga er teke av ein anna kvinnhering, Jorun Larsen, som vart kjend med prosjektet hausten, 2018. Som ein parallell til Lisa Jonrel følgde Larsen musikaren rundt i Berlins undergrunn, kor ho dokumenterte glimt av livet til Ashton Croyd.
Mot slutten av filmen vert desse bileta stilt ut i eit galleri i Charlottenburg, Berlin, og dei fungerer dessutan som ein raud tråd i forteljinga.
Familiært på rollelista
Eg-personen i filmen, Helena von Hoff, vert spela av Anna von Berg. Ho er ikkje berre ein dyktig tysk skodespelar, men også sambuaren til Kloster.
Annonse
Von Berg kan vere eit kjend andlet for fleire. Ho hadde nemleg ei rolle i serien «Deutschland 83», som for nokre år sidan gjorde det stort, både Norge og i resten av verda. Skodespelaren har ein International Emmy frå 2016, og for rolla som Helena von Hoff har ho helde fram å hausta prisar for beste skodespelar.
På lista over skodespelarar kjem det enno meir familiært frå Kloster, ettersom stedottera, Leonore von Berg (13), også spelar i filmen. Leonore var i 2020 aktuell i den tyske Disney-filmen «Vier Zauberhafte Schwestern» og spelar elles i den tyske versjonen av «Klovn», på tysk kalla «Jerks».
