Øybygg legg ut 17 nye tomter i Landamarka
Med berre fire tomter ledige frå førre utbygging, synest Roger Sjo og Øybygg at det var på tide å få løyst ut fleire tomter i Landamarka på Halsnøy. No ligg 17 nye tomter ute for sal.
Publisert
– Vi skal byggja ut 17 nye tomter øvst i byggjefeltet med veg, grøfter, fortau og heile det tekniske anlegget. Vi skal senda inn igangsetjingssøknad om ikkje så lenge, og om vi ser realistisk på det så vil det ta ein tre til fem månadar å byggja ut. Finansieringa er på plass, så vi kjem til å setja i gang, seier dagleg leiar Roger Sjo i Øybygg.
Stor interesse
Annonse
Tomtene ligg på toppen av det allereie utbygde byggjefeltet i Landamarka. Og med utbygginga av dei nye 17 tomtene, opnar det også for eit ekstra område kor det kan koma nokon tomter til på sikt.
– Som dei andre tomtene her i Landamarka, så vert også desse solvent og med nydeleg utsikt. Og sidan dette feltet ikkje ligg så langt frå tunnelen, så er det i nærleik både til Sæbøvik og Husnes. Så eg vil absolutt påstå at det vil vera aktuelt for fleire frå fastlandet å busetja seg her, seier Sjo.
Interessa har så langt vore stor, med fleire klikk på annonsen deira på Finn.no.
– Interessa har vore god og vi har så langt seld to av tomtene, i tillegg har vi delt ut fleire prospekt, seier Sjo.
Annonse
Frå skog til landsby
Dei siste 15 åra har Øybygg forvandla skogen i Landamarka til ein liten landsby. For før desse 17 tomtene vart lagt ut i januar i år, har 34 tomter i byggjefeltet blitt til ein heim.
– Totalt har det poppa opp 50 hushaldingar her dei siste 12-15 åra. Så det har blitt eit godt byggjefelt. Og det er kjekt å sjå at heile feltet utviklar seg, at folk får det fint rundt seg med fine hagar og uteområde, seier Roger og held fram:
– Det er litt annleis her no enn då vi byrja, kan du seia. Då var det berre skog.
